भांगरभूंय | प्रतिनिधी
लखनौ सुपर जायण्ट्सान इंडीयन प्रिमीयर लिगेंत (आयपीएल) काल चेन्नय सुपरकिंग्सा आड 8 विकेटींनी झणझणीत जैत जोडलें. लखनौ चवथ्या जैता सयत चेन्नय सुपरकिंग्स, कोलकाता नायट रायडर्स आनी सनरायझर्स हैदराबाद हांचे वळेरेंत वचून बसलो. ह्या सगल्या पंगडाचे दरेकी 8 गूण जाल्यात.
चेन्नय सुपरकिंग्सान दिल्ले 177 धांवड्यांचे मोखीचो फाटलाव करपी लखनौक लोकेश राहुल आनी क्विंटन डी कॉक हांणी वैयक्तीक अर्द शेंकड्यांची नोंद करतना पयले विकेटी खातीर 134 धांवड्यांची भागिदारी करून बरी मुळावण घालून दिली. ते उपरांत जैता खातीर गरजेच्यो धांवड्यो करतना हेर बॅट्समनांक खर मेहनत घेवची पडूंक ना. लखनौन 19 ओव्हरींनी फकत 2 विकेटी व्हगडावन 180 धांवड्यो करून जैत जोडलें.
ते आदीं अजिंक्य रहाणे (36) आनी रवींद्र जडेजाच्या नाबाद 57 धांवड्यां उपरांत मोईन अली (30) आनी महेंद्र सिंग धोनी (28) हांचे आक्रमक बॅटिंगेक लागून चेन्नय सुपरकिंग्सान निर्धारीत 20 ओव्हरींनी 6 विकेटी व्हगडावन 176 धांवड्यो केल्यो.
चडशे प्रेक्षक महेंद्र सिंग धोनीचो खेळ पळोवपाक स्टेडियमार आयिल्ले. तांकां धोनीची संक्षिप्त आक्रमक खेळी पळोवन समाधान जालें. सातवे सातवे सुवातेर बॅटिंगेक आयिल्ल्या धोनीन आपले खाशेले शैलींत णव बॉलांनी तीन चवके आनी दोन सक्यांचे मजतीन नाबाद 28 धांवड्यांची खेळी केली. ताका लागून चेन्नय सुपरकिंग्साक आव्हानात्मक स्कोर उबारपाक शक्य जालें.
दुसरे वटेन रवींद्र जडेजान धाडशी खेळी करून फकत चेन्नय सुपरकिंग्साक संकश्टांतल्यान भायर काडूंक ना जाल्यार स्टेडियमांत आशिल्ल्या क्रिकेट मोग्यांक मनां जिखलीं. अंदूंच्या हंगामांतलो ताचो हो पयलो अर्द शेंकडो थारलो. ताणें 40 बॉलांनी पांच चवके आनी एक सक्याच्या नेटार नाबाद 57 धांवड्यांची खेळी केली.
ते पयलीं टॉस हारल्या उपरांत पयलीं बॅटींक करपी चेन्नय सुपरकिंग्साची सुरवात बरी जाली ना. रचीन रवींद्र (0) डावाचे दुसरे ओव्हरींत मोहसिन खानाच्या बॉलाचेर बाद जालो. मुखेली ऋतुराज गायकवाड (17) रोखडोच तंबूंत परतलो. यश ठाकूराचे बॉलिंगेचेर विकेटकीपरान फाटल्यान कॅच धरली. पूण, अजिंक्य रहाणेन एक बाजू सांबाळून धरून ल्हवल्हव धांवड्यो वाडयल्यो. ताणें 24 बॉलांनी आपले संक्षिप्त खेळींत पांच चवके आनी एक सको मारलो.
विस्फोटक बॅट्समन शिवम दुबे (3) आनी इम्पॅक्ट प्लेयर समीर रिजवी (1) रोखडेच बाद जाले. ताका लागून चेन्नयचो स्कोर 5 बाद 90 असो जालो. कठीण परिस्थितीतल्यान पंगडाक भायर काडपाची सगली जापसालदारकी जडेजाचेर आयली. ताणें येसस्वी रितीन ही जापसालदारकी सांबाळ्ळी. ताणें पयलीं मोईन अली (30) वांगडा 51 धांवड्यांची म्हत्वाची भागिदारी केली. उपरांत धोनी वांगडा मेळून जलद रितीन धांवड्यो करून चेन्नयक समाधानकारक स्कोर उबारून दिवपाक मजत केली.
लखनौ सुपर जायण्ट्सा वतीन कृणाल पांड्यान 16 धांवड्यो दिवन 2 विकेटी घेतल्यो. जाल्यार मार्कस स्टॉयनीस, यश ठाकूर, मोहसिन खान आनी रवी बिश्नोई हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
