लखनौ आड दिल्ली पयल्या जैताच्या सोदांत

भांगरभूंय | प्रतिनिधी

इंडीयन प्रिमीयर लिगेची (आयपीएल) 26वी मॅच येजमान लखनौ सुपर जायण्ट्स आनी दिल्ली कॅपिटल्स ह्या पंगडां मदीं जातली. ह्या पंगडां मदीं अजून मेरेन तीन मॅची जाल्यात आनी तिनूय खेपे लखनौन जैत जोडलां. ताका लागून दिल्ली पंगड लखनौ आड पयल्या जैताच्या सोदांत आसा.

क्विंटन डी कॉका खातीर अंदूंची आयपीएल मिश्र थारल्या. दोन मॅचींनी अर्द शेंकडे मारल्यात, जाल्यार दोन मॅचींनी सवाय भितर बाद जाला. आयचे मॅचींत व्हड खेळीची ताका आस्त आसतली. हाचें फाटलें एक कारण म्हणल्यार दिल्लीच्या सगल्या मुखेल बॉलरां आड ताणें किमान 150चे स्ट्रायक रेटीन धांवड्यो केल्यात.

इशांत शर्मा आड ताची स्ट्रायक रेट 154, अक्षर पटेला आड 169, खलील अहमदा आड 189 इतकी स्ट्रायक रेट आसा.

लखनौचो मुखेली लोकेश राहुलान अंदूंचे आयपीएलांत धांवड्यो केल्यात खऱ्यो. पूण, स्ट्रायक रेटीचेर प्रस्न उप्रासल्यात. ताणें चार मॅचींनी एक अर्द शेंकडो आनी 31चे सरासरीन 126 धांवड्यो केल्यात. पूण, ताची स्ट्रायक रेट फकत 128.57 इतकी आसा. दिल्ली आड खेळटना ताका आनीक समस्या उप्रासता. अक्षरा आड 64.70 आनी ईशांत शर्मा आड फकत 66.66चे स्ट्रायक रेटीन धांवड्यो केल्यात. अक्षरान राहुलाक पांच डावांनी दोन खेपे बाद केला.

देवदत्त पडिक्कल जेन्ना सावन लखनौंत सामील जाला तेन्ना सावन ताचें बॅट शांत आसा. चार डावांनी 81चे स्ट्रायक रेटीन फकत 22 धांवड्यो केल्यात.

डॅव्हिड वॉर्नर फाटल्या कांय आयपीएलां भशेन अंदूं लेगीत फॉर्मांत आसा. ताणें अंदूं पांच डावांनी एक अर्द शेंकड्याच्या नेटार 31.60चे सरासरीन 158 धांवड्यो केल्यात. पूण, लखनौचो लेक स्पिनर रवी बिश्नोई कडेन ताका आडावपाची तांक आसा. रवीन पांच डावांनी तीन खेपे बाद केला. जाल्यार वॉर्नराची बिश्नोई आड फकत 3.66ची सरासरी आसा.