भांगरभूंय | प्रतिनिधी
लखनौ सुपर जायण्ट्सान इंडीयन प्रिमीयर लिगेचे (आयपीएल) 11वे मॅचींत पंजाब किंग्साक 21 धांवड्यांनी हारयलो. लखनौ सुपर जायण्ट्सान दिल्ले 200 धांवड्यांचो फाटलाव करपी पंजाब किंग्साक निर्धारीत 20 ओव्हरींनी 5 विकेटी वगडावन 178 धांवड्यो करप शक्य जाल्यो. लखनौ सुपर जायण्ट्साचें हें अंदूंच्या हंगामांतलें पयलें जैत थारलें.
पंजाब किंग्सा वतीन मुखेली शिखर धवन हाणें 70 धांवड्यांची खेळी करून आपल्या पंगडाक बरी सुरवा करून दिल्ली. पूण, जॉनी बॅयरस्टो (42) हाका सोडलो जाल्यार एकाय बॅट्समनाक व्हड खेळी करपाक जमली ना. पयले विकेटी खातीर दोगांयनी 11.1 ओव्हरींनी 101 धांवड्यांची भागिदारी केल्ली. ही भागिदारी मयंक यादवान फोडली. ताणें बॅयरस्टोक बाद केलो. ते उपरांत पंजाबाचो डाव भरकटलो. ते मोखी मेरेन पावतले अशें एकदाय दिसूंक ना.
कालचे मॅचींत लखनौ वतीन पदार्पण करपी 21 वर्सां पिरायेच्या मयंक यादवान आपलो ठसो उमठयलो. ताणें सगल्यांत जलद बॉल घालपाचो पराक्रम केलो.
ताणें चार ओव्हरींनी 27 धांवड्यो दिवन 3 विकेटी घेतल्यो. धवनान 3 सके आनी सात चवक्यांचे मजतीन 50 बॉलांनी 70 धांवड्यो केल्यो.
ते पयलीं पयल्या जैताच्या सोदांत आशिल्ल्या लखनौ सुपर जायण्ट्सान सन्मानजनक धांवसंख्या उबारपाक येस मेळयलें. टॉस जिखून येजमान लखनौ सुपर जायण्ट्सान पयलीं बॅटींग करपाचो निर्णय घेतलो. सदचो मुखेली लोकेश राहुल काल ‘इम्पॅक्ट प्लेयरा’च्या रुपांत दिसलो. राहुलान बॅटींग केली तरी तो फिल्डिंग करतना दिसचो ना. ताका लागून फिल्डींग करतना पंगडाचें फुडारपण करपाची जापसालदारकी निकोलस पुरनाचेर येतली. लखनौ सुपर जायण्ट्सान निर्धारीत 20 ओव्हरींनी 8 विकेटी वगडावन 199 धांवड्यो केल्यो.
क्विंटन डी कॉक आनी लोकेश राहुल हे जोडयेन डावाची सुरवात सावकाश केली. राहुलाक (15) बाद करून अर्शदीप सिंगान लखनौ सुपर जायण्ट्साक पयलो धपको दिलो. ते उपरांत क्विंटन डी कॉकान एक बाजू सांबाळून धरतना अर्द शेंकड्याची खेळी केली. ताणें 2 सके आनी 5 चवक्यांचे मजतीन 38 बॉलांनी सगल्यांत चड 54 धांवड्यो केल्यो. ते उपरांत पुरन आनी कृणाल पांड्या हांणी आक्रमक बॅटींग करून लखनौक आव्हानात्मक धांवसंख्या उबारून दिली.
निकोलस पुरनान 42 आनी कृणाल पांड्यान नाबाद 43 धांवड्यांचें योगदान दिलें. देवदत्त पडिक्कल (9), मार्कस स्टॉयनीस (19), आयुष बदोनी (8), रवी बिश्नोई (0), मोहसीन खान (2) सवाय भितर बाद जाले.
पंजाब किंग्सा वतीन सॅम करनान सगल्यांत चड 3 विकेटी घेतल्यो. अर्शदीप सिंगान दोन जाल्यार कगिसो रबाडा आना राहुल चाहर हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
