भांगरभूंय | प्रतिनिधी
लखनौ सुपर जायण्ट्साच्या युवा बॉलरांनी रॉयल चॅलेंजर्स बंगळुरूक ताच्या घरच्या मैदानाचेर 28 धांवड्यांनी हारयलो. मयांक यादवाच्या वेगा मुखार परत एकदा प्रतिस्पर्धी पंगडाक दिमी मारची पडली.
देवदत्त पडिक्कल बॅटिगेंत अपेशी थारलो आसलो तरी, ताणें उत्कृश्ट थ्रो मारून बंगळुरूचो मुखेली फाफ ड्युप्लेसिसाक धांवबाद केलो आनी बंगळुरूचे हारीचो हो टर्निंग पॉयण्ट थारलो. ते उपरांत संघर्श करून लेगीत बंगळुरूक हार टाळपाक जमली ना.
विराट कोहली आनी फाफ ड्युप्लेसीस हांणी बंगळुरूक बरी सुरवात करून दितना 4.2 ओव्हरींनी 40 धांवड्यो करून दिल्यो. मणीमारन सिद्धार्थ हाणें लखनौक पयलें येस मेळोवन दितना कोहलीची (22) विकेट मेळयली. एक धांवडी घेवपाच्या यत्नांत फाफ ड्युप्लेसीस (19) धांवबाद जालो. यादवान तेच ओव्हरींत 157 किलोमिटर प्रती वेगान बॉल घालून ग्लॅन मॅक्सवॅलाक (0) बाद केलो. ते उपरांत कॅमेरून ग्रिनाक बोल्ड करून बंगळुरूची स्थिती बिनबाद 40 वयल्यान 4 बाद 58 अशी केली.
रजत पाटीदार आनी अनुज रावत हांणी कांय वेळ डाव सांबाळपाचो यत्न केलो. पूण, अनुजाक (11) व्हड खेळी करपाक जमली ना. पाटीदार (29) संघर्श करतालो. पूण, मयांकाच्या वेगा मुखार तो लेगीत फसलो आनी पडिक्कलान कॅच धरली.
मयांकान 4 ओव्हरींनी 14 धांवड्यो दिवन 3 विकेटी घेतल्यो. महिपाल लोमरोर आकर्शक शॉर्ट खेळटालो. ताणें बंगळुरूची आस्त जिवी दवरिल्ली. पूण, दिनेश कार्तिक (4) बाद जाल्ल्यान बंगळुरूचें टॅन्शन परतून वाडलें. मयांक डागर (0) धांवबाद जालो. महिपालाच्या रुपान निमाणी आस्त 18वे ओव्हरींत सोंपली. अखेरेक बंगळुरूचो डाव 19.4 ओव्हरींनी 153 धांवड्यांचेर सोंपलो.
ते आदीं टॉस हारल्या उपरांत पयलीं करपी लखनौ सुपरजायण्ट्साचो ओपनर क्विंटन डी कॉकान आनीक एक उत्कृश्ट खेळी केली. रॉयल चॅलेंजर्स बंगळुरूच्या बॉलरां आड पयले ओव्हरी सावन सुरू केल्लो हल्लो 17वे ओव्हरींत थांबलो.
लखनौ सुपरजायण्ट्साक ताणें आव्हानात्मक धांवसंख्या उबारून दिली. लखनौ सुपरजायण्ट्साक आनीक धांवड्यो करपाक जमतल्यो आशिल्ल्यो. पूण, मार्कस स्टॉयनीसाची विकेट पडली आनी बंगळुरूच्या बॉलरांनी आपलें प्रदर्शन सुदरायलें. ग्लॅन मॅक्सवॅलान दोन म्हत्वाच्यो विकेटी घेतल्यो. अनुज रावत आनी फाफ ड्युप्लेसीस हांणी जबरदस्त कॅची धरल्यो, ताका लागून लखनौच्या वेगाक ब्रेक लागलो.
क्विंटन आनी लोकेश राहुल हाणें पयले विकेटी खातीर 53 धांवड्यांची भागिदारी केली. ही भागिदारी मॅक्सवॅलान फोडली. ताणें राहुलाक 20 धांवड्यांचेर बाद केलो. मजगतीं, क्विंटनान काल तीन हजारांचो टप्पो हुपलो. असो पराक्रम करपी तो ए बी डिविलियर्स आनी फाफ ड्युप्लेसीस हांच्या उपरांत तिसरो दक्षीण आफ्रिकेचो बॅट्समन थारलो. क्विंटनाक मार्कस स्टॉयनीसाची बरी साथ मेळ्ळी. दोगांयनी 27 बॉलांनी अर्द शेंकड्याची भागिदारी पुर्ण केली.
मॅक्सवॅलान परतून एकदा आपले स्पिन बॉलिंगेचेर स्टॉयनीसाक (24) कॅच बाद केलो. मॅक्सवॅलान चार ओव्हरींनी 23 धांवड्यो दिवन 2 विकेटी घेतल्यो. स्टॉयनीस बाद जाल्या उपरांत लखनौचो धांवड्यो करपाचो वेग उणो जालो. 17वे ओव्हरींत टॉप्लीन बंगळुरूक व्हड येस मेळोवन दिलें. क्विंटन 56 बॉलांनी आठ चवके आनी पांच सक्यांचे मजतीन 81 धांवड्यो करून तंबूंत परतलो. यश दयालान स्लो बॉल घालून लखनौच्या बॅट्समनांक बांदून दवरले. 19वे ओव्हरींत निकोलस पुरनान सेगीत तीन सके मारून लखनौक परतून ट्रॅकाचेर हाडलो.
निकोलसान 21 बॉलांनी एक चवको आनी पांच सक्यांचे मजतीन नाबाद 40 धांवड्यो केल्यो आनी लखनौक 5 बाद 181 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
