भांगरभूंय | प्रतिनिधी
येजमान लखनौ सुपर जायण्ट्सान इंडीयन प्रिमीयर लिगेचे (आयपीएल) 48 मॅचींत मुंबय इंडियन्साक 4 विकेटींनी हारयलो. मुंबय इंडियन्सान दिल्ली 145 धांवड्यांची मोख लखनौ सुपर जायण्ट्सान 19.2 ओव्हरींनी 6 विकेटी व्हगडावन मेळयली.
ह्या जैतान लखनौचे 12 गूण जाल्यात आनी तो गुणतकट्यांत तिसरे सुवातेर पावलो. दुसरे वटेन मुंबय इंडियन्साचें प्ले ऑफांत पावपाचें सपन लागींलागीं भंगिल्ल्यांत जमा जालां. 10 मॅचींतल्यान ताचे स गूण आसात. उरिल्ल्यो चार मॅची जिखल्यो जाल्यार ताचे 14 गूण जावपाक शकता, अशे परिस्थितींत ताका हेर पंगडांच्या निकालांचेर ताचें प्ले ऑफाचें गणीत निंबून आसा.
पदार्पण करपी अर्शीन कुलकर्णीन ताचे पयलेच ओव्हरींत नुवान तुषाराक एलबीडब्ल्यू बाद केलो. मुंबयच्या बॉलरांनी चेपण दवरलें. पूण, हार्दीक पांड्यान जसप्रीत बुमराक सेगीत दुसरी ओव्हर दिवंक ना. मुंबय खातीर ताची ही व्हड चूक थारली. ताणी चवथी ओव्हर गेराल्ड कोएत्झीक दिली आनी मार्कस स्टॉयनीसान ते ओव्हरींत 11 धांवड्यो करून लखनौ वयलें चेपण उणें केलें. ते उपरांत तुषाराचे फुडले ओव्हरींत लोकेश राहुलान तीन चवके, एक सको आनी दोन धांवड्यो करून 20 नोंदयल्यो. उपरांत हार्दीक सको मारपाच्या यत्नांत राहुल बाद जालो. बाद जावचे पयलीं ताणें स्टॉयनीसाक वांगडा 58 धांवड्यांची भागिदारी केली.
लखनौन 10 ओव्हरींनी 80 धांवड्यो केल्यो आनी फुडल्या 60 बॉलांनी 65 धांवड्यांची गरज आशिल्ली. स्टॉयनीस आनी दीपक हुडा (18) हांचे मदली 40 धांवड्यांची भागिदारी हार्दीकान फोडली. स्टॉयनीसान 39 बॉलांनी अर्द शेंकडो पुर्ण केलो. ताणें 45 बॉलांनी सात चवके आनी दोन सक्यांचे मजतीन 62 धांवड्यो केल्यो. अॅश्टन टर्नर (1) रोखडोच बाद जालो. पूण, आयुष बदोनीन दोन चवके मारून लखनौ वयलें चेपण उणें केलें. 12 बॉलांनी 13 धांवड्यो जाय आशिल्ल्यो त्या वेळार बदोनी बाद जालो. पुरनान मॅच लागीं हाडली. आनी उपरांत जैताचें औपचारीक पुर्ण केलें.
ते आदीं लखनौ सुपर जायण्ट्साच्या बॉलरांनी मुंबयचे ओपनर ईशान किशन आनी रोहीत शर्मा हांकां चेपणाखाला दवरले. मोहसिन खानान दुसरेच ओव्हरींत रोहीताक (4) बाद केलो. उपरांत सुर्यकुमार यादव 6 बॉलांनी 10 धांवड्यो करून स्टॉयनीसाच्या बॉलाचेर लोकेश राहुलाक कॅच दिवन तंबूंत परतलो. लोकेशान अचूक डीआरएस घेतलो. बॉलांनी मुंबय इंडियन्साचे धांवगतीचेर ब्रेक लायिल्लो. मुंबयक चवको मेळप लेगीत कठीण जाल्लें. तिलक वर्मा (7) सवे ओव्हरीच्या पयल्या बॉलाचेर धांवबाद जालो. मुखेली हार्दीक पांड्या शुन्याचेर बाद जालो. अशे तरेन मुंबय इंडियन्साची स्थिती 4 बाद 22 अशी बिकट जाल्ली. पावर प्लेंत मुंबय इंडियन्साक 4 बाद 28 धांवड्यो करप शक्य जालें. अंदूंच्या हंगामांतली ताची ही दुसरी बाबत कामगिरी थारली.
मुंबयक 10 ओव्हरींनी 4 बाद 57 धांवड्यां मेरेन मजल मारप शक्य जालें.
नेहल वढेरा आनी ईशान किशन हांणी पांचवे विकेटी खातीर 53 धांवड्यांची भागिदारी केल्ली. पूण, रवी बिश्नोईचे गुगलीचेर ही जोडी फुटली. ईशान 32 धांवड्यांचेर कॅच बाद जालो. नेहल बरी बॅटींग करतालो. पूण, मोहसिन खानाच्या उत्कृश्ट यॉर्कराचेर तो बोल्ड जालो. नेहलान 41 बॉलांनी चार चवके आनी दोन सक्यांचे मजतीन 46 धांवड्यो करून बाद जालो.
19वे ओव्हरींत मयांक यादवान मोहम्मद नबीक (1) बोल्ड केलो. टीम डॅव्हिडान 18 बॉलांनी नाबाद 35 धांवड्यो करून मुंबय इंडियन्साक 7 बाद 144 मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
