भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान लखनौ सुपर जायण्ट्स आनी पंजाब किंग्स ह्या पंगडां मदीं मॅच जातली. लखनौ सुपर जायण्ट्साचें दरेक विभागांत उत्कृश्ट प्रदर्शन करपाचो यत्न आसतलो. लखनौ सुपर जायण्ट्साक पयले मॅचींत राजस्थान रॉयल्सा आड 20 धांवड्यांनी हार घेवची पडिल्ली. कृणाल पांड्याक सोडलो जाल्यार लखनौचे सगलेच बॉलर अपेशी थारिल्ले.
मार्क वूड आनी डॅव्हिड विली हांचे गैरहाजेरेंत लखनौचो बॉलींग विभाग दुबळो जाला. मोहसीन खान, नवीन उल हक आनी यश ठाकूर ह्या बॉलरां कडल्यान बऱ्या प्रदर्शनाची आस्त पंगड वेवस्थापनाक आसतली. संवसारीक टी-20 सर्ती खातीर राष्ट्रीय पंगडात सुवात मेळोवपाच्या यत्नांत आशिल्ल्या रवी बिश्नोईक खाशेलें प्रदर्शन करपाक जमूंक नाशिल्लें. मुखेली लोकेश राहुलान लेगीत संवसारीक टी-20 सर्त नदरे मुखार दवरून विकेटकीपर आनी बॅट्समनाची भुमिका वठोवपाचो निर्णय घेतिल्लो. पयले मॅचींत ताणें 58 धांवड्यांची खेळी केल्ली. आयचे मॅचींत प्रदर्शनांत आनीक सुदारणां करपाचो ताचो यत्न आसतलो.
तशेंच ओपनर क्विंटन डी कॉक शक्य तितले बेगीन फॉर्मांत येवचो अशी लेगीत आस्त पंगड बाळगून आसतलो. देवदत्त पडिक्कल, आयुष बडोनी, दीपक हुड्डा आनी कृणाल हे सकयले सुवातेर बरे प्रदर्शन करतले अशी आस्त पंगडाक आसतली. लखनौचें येस हें ऑस्ट्रेलियेचो अश्टतासांचो खेळगडो मार्कस स्टोयनीस हाच्या फॉर्माचेर लेगीत निंबून आसतलें. पोरूं ताणें 408 धांवड्यो करून लखनौ वतीन सगल्यांत चड धांवड्यो केल्ल्यो.
पंजाब किंग्सान एक जैत आनी एक हार घेतल्या. शिखर धवनाच्या फुडारपणाखाला खेळपी पंजाब किंग्साक पावरप्लेंत धांवगती वाडोवपाची गरज आसा. अशें फकत जॉनी बॅयरस्टो फॉर्मांत आसल्यार जावपाक शकता. पयल्या दोन मॅचींनी तो अपेशी थारिल्लो आनी ताका लागून पंजाबाची पावरप्लेंतली धांवगती उणी जाल्ली. फकत आयपीएलांत खेळपी शिखर धवनाक लेगीत आपल्या स्ट्रायक रेटींत वेग हाडचो पडटलो. रॉयल चॅलेंजर्स बंगळुरू आड आपणेन खूब सावकाश बॅटींग केली अशें स्वता धवनान मान्य केलां.
प्रभसिमरन सिंगाक बरे सुरवाती उपरांत व्हड स्कोरांत रुपांतरीक करपाक जमूंक ना. अश्टतासांचो खेळगडो सॅम करनान फाटल्या दोनूय मॅचींनी धांवड्यो केल्ल्यो. पूण, बॉलिंगेंत आपलो ठसो उमठोवपाक जमूंक नाशिल्लो. उप मुखेली जितेश शर्मा लेगीत संवसारीक टी-20 सर्ती खातीर पंगडांत सुवात मेळोवपाच्या यत्नांत आसा. राष्ट्रीय निवड समितीच्या वांगड्यांचें लक्ष आपले वटेन ओडून घेवपा खातीर ताका बरें प्रदर्शन करचें पडटलें.
फास्ट बॉलींग विभागांत कगिसो रबाडाक करन, अर्शदीप सिंग आनी हर्षल पटेल हांच्या कडल्यान तेंक्याची आस्त आसतली. स्पिनर हरप्रीत बरार बरी बॉलींग केल्या लेग स्पिनर राहुल चाहराक लेगीत बरी बॉलींग घालची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
