भांगरभूंय | प्रतिनिधी
नवी दिल्ली, खबरां संस्था ः संवसारीक नामनेचे ऍमेझॉन कंपनींत कर्मचाऱ्यां कडेन अमानवी वागणूक जाता अशी खबर उजवाडाक आयलां. हरियाणाच्या मानेसरांतल्या ऍमेझॉन कंपनीच्या गुदावांतल्या कर्मचाऱ्यांनी थारायिल्लें लक्ष्य (टार्गेट) पुराय करपा खातीर तांकां त्रास दितात अशी कागाळ केल्या. 24 वर्सां पिरायेच्या एका कर्मचाऱ्यान सांगलें, सप्तकांतले पांच दीस आमी धा वरांची शिफ्ट करतात. आमचे वरिश्ठ लोक केन्ना केन्ना शौचालयांत वचून वेळ घालयतात काय? हें पळयात. म्हयन्याक फकत 10,088 इतलो पगार मेळटा आसतना आमकां शौचालयांत वचपाक आनी उदक पियेवपाक लेगीत बंदी घाल्या. ‘इंडियन एक्सप्रेस’ दिसाळ्यान हे संबंदी सविस्तर म्हायती उजवाडायल्या.
आनीक एका कर्मचाऱ्यान सांगलें, धा वरांचे शिफ्टींत जेवपाक आनी च्या खातीरचो 30 मिनटांचो ब्रेक टाळ्ळो तरी आमी चार ट्रकां परस चड पार्सलां लोड करुंक शकनात. दोन दीस आदीं आमकां आमच्या वरिश्ठांनी उदक पियेवपाक आनी शौचालयालयांत वचचें न्हय असो सोपूत घातिल्लो. हाचे वरवीं ते आमच्या थारायिल्ल्या टार्गेट मेरेन पावपाचो यत्न करतात.
कर्मचाऱ्यांनी केल्ले आरोप मुखार आयले उपरांत अमेझॉन इंडियाच्या प्रवक्त्यान तांची बाजू मांडली. ह्यो कागाळी कोणे केल्यात हाची चवकशी आमी करतात अशें तांणी सांगलें. पूण आमी कर्मचाऱ्यांक अशी वागणूक दिनात. अशा अमानवीपणाक आमचे वेवसायीक वेवस्थेंत सुवात ना. ह्यो कागाळीं खरीं आशिल्ल्याचें कळ्ळें जाल्यार आमी तांचेर बेगोबेग कारवाय करतले. आमच्या कर्मचाऱ्यांची भलायकी आनी सुरक्षीतताय सांबाळपा खातीर आमच्या वेवस्थापकांक परतून प्रशिक्षण दितले अशें प्रवक्त्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
