भांगरभूंय | प्रतिनिधी
कोलंबो: लंका प्रिमीयर लिगचो (LPL) सवो हंगाम १० जुलय सावन सुरू जातलो. ही सर्त सुरू जावचे पयलींच लिगाक कोट्यांनी डॉलरांचें व्हड अर्थीक बळगें मेळ्ळां.
लंका प्रिमीयर लिगाचे प्रमोटर ’इनोव्हेटिव्ह प्रॉडक्शन ग्रुप’ (Innovative Production Group FZ, LLC – IPG) हे कंपनीक अमेरिकेंतल्या शेअर बाजारांत नोंदणी जाल्ले कंपनीकडल्यान हो व्हड अर्थीक निधी मेळ्ळा.
आयपीजी कंपनीन अमेरिकेच्या ’फ्लॅश स्पोर्ट्स अँड मिडिया’ (Flash Sports Media, Inc.) हे कंपनी वांगडा आपल्या सगळ्या शेअर्सचें धोरणात्मक विलीनीकरण (Strategic Merger) पुराय केलां. ह्या वेपारी कराराक लागून, लंका प्रिमीयर लिगाच्या वेपारी हक्कां वांगडा आयपीजीकडेन आशिल्ले सगळे ’टी-२० क्रिकेट लिगचे’ हक्क आतां नॅसडॅक (Nasdaq) ह्या अमेरिकन शेअर बाजारांत नोंदणी जाल्ल्या ’युग्रो’ (UGRO) ह्या प्लॅटफॉर्मच्या भितर आयल्यात.
आयपीजी कंपनी फुडल्या दोन वर्सांत लंका प्रिमीयर लीग पयलीं परस चड भव्य आनी उत्तम करपा खातीर २० दशलक्ष यूएस डॉलर्स गुंतयतली.
लंका प्रिमीयर लीग खातीर हो बदल एका नव्या युगाची सुरुवात आसा. ’एलपीएल’ ही मुळची ’श्रीलंका क्रिकेट’चीच इंटेलेक्च्युअल प्रॉपर्टी (IP) उरतली; पूण आयपीजी ग्रुपा कडेन तिचे सगळे विशेश वेपारी आनी मिडिया प्रक्षेपण हक्क कायम उरतले. आयपीजी ग्लोबलाचे संस्थापक आनी अध्यक्ष अनिल मोहन म्हण्ळे हे नवे घडणुकेचो सगळ्यांत व्हड फायदो लंका प्रिमीयर लिगाक जातलो.
लंका प्रिमीयर लिगा भायर, ’आयपीजी ग्रुप’न मलेशिया आनी झिम्बाब्वे हांगा टी-२० क्रिकेट लीग विकसीत करपा खातीर दीर्घकालीन विशेश करार केल्यात. वेपारी उत्पन्न वाडोवपा खातीर एक एकत्रीत प्लॅटफॉर्म तयार करप हो ह्या फाटलो मुखेल हेतू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
