भांगरभूंय | प्रतिनिधी
हार्दीक पांड्या इंडीयन प्रिमीयर लीग 2024 वरवीं पुनरागमन करतना मुंबय इंडियन्साचें फुडारपण करपा लेगीत तयार आसा. तशेंच बॉलींग घालपाक आपूण पुर्ण तंदुरुस्त आसा हें लेगीत स्पश्ट केलें.
मुंबय इंडियन्साच्या वेवस्थापनान सदचो मुखेली रोहीत शर्माक काडून हार्दीक पांड्याक मुखेली केला. हे विशीं उलयतना पांड्यान म्हणलें, म्हजे आनी रोहीत शर्मा मदीं कसलेच मतभेद नात. आमी फाटल्या 10 वर्सां सावन एकठांय खेळत आसात. सगली कारकिर्द ताच्याच फुडारपणा खेळ्ळा. ताचो सदांच आपल्याक तेंको आसतलो हें आपल्याक खबर आसा.
फाटल्या कांय आयपीएलाच्या हंगामांनी रोहीत शर्माक म्हणपा सारकें प्रदर्शन करपाक जमूंक नाशिल्लें. फाटल्या पांच हंगामांनी रोहीताची सरासरी 24.89 इतकीच आशिल्ली.
वर्साचे सुरवाती सावन आपूण तंदुरुस्त आसा अशें पोरूं संवसारीक वन डे क्रिकेट सर्ती वेळार खोंट दुखाविल्ल्यान तो ऑक्टोबरा सावन क्रिकेट मैदाना पसून पयस आशिल्ल्या हार्दीकान स्पश्ट केलें.
मुंबय इंडियन्सान हे खेपे बॉलरांक विकते घेवपाक बरोच पयसो खर्च केला. ताणें 17.75 कोटी रुपयांचे पर्सींतल्यान 14.40 कोटी दक्षीण आफ्रिकेच्या जेराल्ड कोएत्झी आनी श्रीलंकेच्या दिलशान मदुशंका आनी नुवान तुषारा हांचेर खर्च केल्यात. तशेंच अफगाणिस्तानाचो अश्टतासांचो खेळगडो मोहम्मद नबीन लेगीत विकतो घेतला.
विदेशी खेळगड्यांचेर नदर मारली जाल्यार एक गजाल स्पश्ट जाता. आमकां बरेच पर्याय उपलब्ध जाल्यात. अंदूंच्या हंगामांत परिस्थिती प्रमाण आमकां जाय तसो पंगड वेंचपाक मेळटलो. वेगळ्यावेगळ्या परिस्थितींत खंयचो खेळगडो फायदेशीर थारुये हें पळोवचें पडटलें अशें मुंबय इंडियन्साचो प्रशिक्षक मार्क बावचरान म्हणलें.
मुंबय इंडियन्स तीन विदेशी खेळगड्यां वांगडा मैदानांत देंवतलो अशे संकेत बावचरान ह्या वेळार दिले.
रोहीत शर्मा विशीं उलयतना बावचरान म्हणलें, रोहीताक आमी जापसालदारके पसून मुक्त केला. ही गजाल पंगडा खातीर फायदेशीर थारुये. रोहीत सध्या फॉर्मांत आसा. इंग्लंडा आडचे टॅस्ट माळेंत ताका खेळटना पळयला. ताचो फॉर्मांत दिसतालो. आयपीएलांत तो कसलेंच चेपण घेनासतना खेळचो अशी आपली आस्त आसा अशें ताणें मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
