भांगरभूंय | प्रतिनिधी
मडगांव, प्रतिनिधी ः लिपीचो प्रस्न फकत कोंकणी मेरेन मर्यादीत ना. जाल्यार भारतीय जायत्या भाशांनी दोन ते तीन लिपी आसात. साहित्य अकादेमीन व्हड अभ्यासा उपरांत एक भास एक लिपी हो नेम लागू केलो आनी आमी तो पाळटात. आतां कोंकणी भाशेच्या सगळ्या पांवड्या वयल्या अंमलबजावणीचेर लक्ष दिवपाची गरज आसा अशें कोंकणी भाशा मंडळाचे प्रभारी अध्यक्ष रत्नमाला दिवकार हांणी सांगलें.
कोंकणी भाशा मंडळाचे पत्रकार परिशदेंत रत्नमाला दिवकार, सचीव मंगलदास भट, माया खरंगटे, ऋषिकेश कदम हाजीर आशिल्ले. ह्या वेळार कोंकणी भाशेक बोलीभाशा म्हणिल्ल्याचो निशेध नोंद जालो. आमदार विजय सरदेसाय हांणी सुदीन ढवळीकार हांकां मराठी भाशे बदला कोंकणी भाशेंत उलोवपाक सांगिल्लें अशें दिवकार हांणी सांगलें. ढवळीकार ज्या भाशेत लोकां कडल्यान मतां मागता ती भास विधानसभेंत वापरपाची याद सरदेसाय हांणी करुन दिल्ली आसूं येता आनी तांकाय ती मान्य जाल्ल्यान ताचेर हरकत घेतली ना. हाचो निशेध करतना कांय मराठी मोगींनीय कोंकणी ही एक बोलीभाशा अशें विधान केलें हाचो कोंकणी भाशा मंडळ निशेध करता अशें दिवकार हांणी सांगलें.
राजभास कायद्याक कोणूच हात लावचो ना अशें मुख्यमंत्री प्रमोद सावंत हांणी विधानसभेंत स्पश्ट केलें. विधानसभेचें कामकाज कोंकणींतल्यान चलता. कोंकणीची सेवा करपी संस्थांचे अनुदान वाडोवपाची मागणी सरदेसाय हांणी केली. हेर आमदारांनीय कोंकणीचो अभिमान दाखोवचो. कोंकणी भाशेक कायद्यान मान्यताय मेळ्ळ्या. हे भाशेंतल्या लेखकांक दोन ज्ञानपीठ पुरस्कार मेळ्ळ्या. कोंकणी ही गोंयची भास, अस्मिताय आनी अस्तित्व आनी ती संघर्शांतल्यान मेळयल्या. ताका लागून राजभास कायद्याक हात लावचो न्हय अशेंय दिवकार हांणी सांगलें.
रोमी लिपीचो मुद्दो राजकीय हेतून प्रेरीत
रोमी कोंकणी भाशेकय समान दर्ज्या परस चड दर्जो दितात. दाल्गादो कोंकणी अकादमी, कोंकणी भाशा मंडळाक अनुदान मेळटा, कोंकणी भाशा मंडळाचे पुरस्कार रोमी कोंकणी साहित्याक मेळ्ळ्यात. हो मुद्दो राजकी हेतून मुखार आयला. दोन समाज, दोन धर्मात विभागल्यार तिसऱ्याकच फायदो जातलो. 35 वर्सां गोंयांत देवनागरी कोंकणींतल्यान शिकतात वा बरयतात. देवनागरी हिंदू आनी रोमी लिपी किरिस्तांवांची अशे दाखोवप चुकीचें. देवनागरी कोंकणी भास शिक्षणाक योग्य आसा. शिक्षणांत रोमी कोंकणी येवची न्हय हें धोरण आसा. कारण तें दोन धर्मांनी विभागपा सारकें जातलें अशें ऋषिकेश कदम हांणी सांगलें.
पंचायतीचे थाराव निरर्थक
राजभास कायद्या संबंदीं पंचायत पांवड्यार ग्रामसभांनी घेतिल्ले थाराव निरर्थक आसात. कोंकणी भाशेचो अपमान करप म्हणल्यार संविधानान भाशेक दिल्ल्या हक्का विशीं उलोवपा सारकें. रोमी लिपीचो प्रस्न भावनीक पांवड्यार पावला. वापर चडसो देवनागरीचो आसा. ते खातीर राजभास कायद्याक हात लावचो न्हय अशें रत्नमाला दिवकार आनी कदम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
