भांगरभूंय | प्रतिनिधी
म्हापशें: सावळें, पिळर्ण हांगा ऑडीट भवना कुशीक रेहबर खुर्शीद अली खान (22, मूळ उत्तर प्रदेश) हाच्या खून प्रकरणांतलो दुबावीत आरोपी सचीन नागेंद्र सिंग (28, ओर्डा कांदोळी), आनंद सहदेव चिकलगेकार (21, रा. मयडें, मूळ शेळपें वाळपय) आनी संतोष उमेश गांवस (23, रा. आंगड, म्हापशें) ह्या तिगांची पणजी अतिरिक्त सत्र न्यायालयान सशर्त जामिनाचेर सुटका केल्या.
ह्या खून प्रकरणांत आतां वट्ट 11 दुबावीत आरोपीं मदीं आतां मेरेन स जाणांक जामीन मेळ्ळा. हातूंत संदेश श्याम नायक (27, रा. फट्टावाडो नेरूल, मूळ गवळीवाडो काकोडें), निलेश आत्माराम तुपकार (सर्वेवाडो, गिरी) आनी बिदेश रादेश हसूटीकार (24, रा. डांगी कॉलनी, म्हापशें) हांचो आस्पाव आसा.
न्यायाधीश बॉस्को जी. एफ. रॉबर्टस् हांणी दुबावीत बिदेश हाका 25 हजारांची हमी रक्कम आनी तितल्याच रकमेच्या हमिदाराच्या हमी प्रमाण जामीन मंजूर केला. न्यायालयाचे परवानगे बगर देशा भायर वचप ना, दरेक सुनावणे वेळार हाजेरी लावप, साक्षी पुराव्यांत छेडछाड, साक्षिदारांक धमकावपाचो यत्न करप ना, वॉट्सअॅप सेवा आशिल्ले मोबायल क्रमांक आनी राबित्याचो नामो न्यायालय आनी पुलीस स्टेशनार सादर करप, जामिनार आसतना समान वा हेर खंयचोच गुन्यांव करप ना अश्यो अटी न्यायालयान लागू केल्यात.
न्यायालयांत दुबावीत सचीन सिंग हाचे वतीन अॅड. राहूल देसाय, अॅड. भार्गव सामंत हांणी जाल्यार दुबावीत आनंद चिकलगेकार आनी संतोष गांवस हांचे वतीन अॅड. मायकल नाझारेथ आनी हर्षा केरकार हांणी युक्तिवाद केलो. सरकारी पक्षा वतीन सरकारी अभियोक्ता कोलेमॉन रॉड्रिग्ज हांणी युक्तिवाद केलो.
मजगतीं, हो खुनाचो प्रकार 16 एप्रील 2024 दिसा उत्तर रातीं घडिल्लो. सावळें पिळर्ण, पर्वरे ऑडीट भावना कुशीक मयत रेहबराची कूड पुलिसांक गस्ती वेळार सांपडिल्ली. मयताक मरण मान मोडिल्ल्यान तशेंच फाटीच्या कण्याक खर इजा जावन आनी रक्तस्रावाक लागून जाल्ल्याचें मरणा उपरांतचे तपासणेच्या अहवालांतल्यान स्पश्ट जाल्लें.
उपरांत पुलिसांनी दुबावीत विकास यादव (रा. कोदांळी), खतेश तुकाराम कांदोळकार, सुमन हेमंत बरीक, सचीन चंद्रीका सहानी, तनय सुब्राय कांदोळकार, सचीन नागेंद्र सिंग (सगले रा. कांदोळी), आनंद सहदेव चिकलगेकार (मयडें मूळ वाळपय), संतोष उमेश गांवस (म्हापशें), संदेश नायक (नेरूल, मूळ काकोडें), निलेश आत्माराम तुपकार (गिरी) आनी बिदेश हसूटीकार (डांगी कॉलनी म्हापशें) ह्या 11 जणांक अटक केल्ली. दुबावितां आड भा.दं.सं.च्या 143, 147, 342, 365, 392, 201, 302 आनी 149 कलमा खाला गुन्यांव नोंद करून न्यायालयांत आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
