भांगरभूंय | प्रतिनिधी
हे बसकेंत गोंय, मेघालय, बिहार, हरियाणा तशेंच हेर राज्यांचे मुख्यमंत्री आशिल्ले हजर
नवी दिल्ली, खबरां संस्था: अर्थमंत्री निर्मला सीतारामन हांणी ५३वी जीएसटी परिशदेची बसका घेतली. हे बसके उपरांत भारतीय रेल्वेची जायती सेवा जीएसटीच्या आवांठा वयल्यान काडून उडयल्या अशी म्हायती तांणी दिली. ते प्रमाण आतां प्लॅटफॉर्म तिकेटींचेर जीएसटी लागू जावची ना. तशेंच तिख्या आनी ऍल्युमिनियमा पसून केल्ल्या सोलर कुकर आनी दुदाच्या कॅनांचेर १२ टक्के जीएसटी लावपाची सुचवणी केल्या. हाचे भायर कागद आनी कागदाच्या बोर्ड पसून तयार केल्ल्या कार्टनाचेर १२ टक्के जीएसटीची शिफारस केल्या. वेवसाय वाडोवपा खातीर आनी करदात्यांक सुटका दिवपा खातीर आमी जायते निर्णय घेतल्यात अशें तिणें सांगलें.
ऑनलायन गेमींग उद्देगाचेर २८ टक्के जीएसटी घेवपा विशीं बसकेंत चर्चा जावंक ना अशें अर्थमंत्री निर्मला सीतारामन हांणी सांगलें. हो विशय बसकेच्या अजेंडांत नाशिल्लो. देखून ऑनलायन गेमींग आनी कॅसिनो खातीर सुटका मेळटली अशी आस्त सोंपल्या. जीएसटी कावन्सिलाचे बसकेंत जायत्या प्रस्नांचेर चर्चा जाली. हे बसकेंत अन्यायान वाडयिल्ल्या दराचो मुद्दोय हजर केलो.
अर्थमंत्री म्हणटा, सगल्या प्रकारच्या स्प्रिंकलरांचेर १२ टक्के जीएसटी घेवपा विशीं चर्चा जाल्या. पेपर कार्टन बॉक्स आनी स्प्रिंकलरांचेर जीएसटी उणी जाल्ल्यान हिमाचल आनी जम्मू-काश्मीरांतल्या आपोल पिकोवप्यांक व्हड फायदो जातलो. ते भायर देशभर आधार आदारीत बायोमेट्रीक वळख सुनिश्चीत करपा खातीर वेवस्था जातली. हाका लागून बनावट इनव्हॉयसा वरवीं बनावट इनपुट टॅक्स क्रेडीकच्या घडणुको जावच्यो ना.
हाचे वांगडा जीएसटी काव्न्सिलच्या बसकेंत प्रकरणांचो आंकडो उणो करपाच्या निर्णयूय घेतलो. हाचे खाला आतां जीएसटी अपील न्यायालयाची अर्थीक मर्यादा २० लाख रुपया मेरेन वाडयल्या. ही रक्कम उच्च न्यायालयाक १ कोटी आनी सर्वोच्च न्यायालयाक २ कोटी रुपया आसतली.
बॅटरीचेर चलपी वाहनां आनी रेल्वेच्या आंतर रेल्वे सेवांकय करांतल्यान सुट दिल्या. हे बसकेंत गोंय आनी मेघालयाचे मुख्यमंत्री, बिहार, हरियाणा, मध्य प्रदेश आनी ओडिशाचे उपमुख्यमंत्री, राज्य आनी केंद्रीय प्रदेशांचे अर्थमंत्री (विधानसभा सयत) आनी केंद्र आनी राज्य सरकाराचे वरिश्ठ अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
