भांगरभूंय | प्रतिनिधी
6 वर्सांचो चलो चुकून चडलो दुसरेच रेल्वेंत
पर्यटकांचे कागाळी वेल्यान पुलिसांनी घेतलो रोखडोच सोद
मडगांव: उत्तर प्रदेशांतल्यान गोंयांत पर्यटना खातीर आयिल्ल्या पर्यटक कुटुंबाचो स वर्सां पिरायेचो चलो रेल्वे स्टेशनार लागिल्ले दुसरेच रेल्वेंत चडलो. गाडी सुटले उपरांत पर्यटकांक चलो नाशिल्ल्याचें लक्षांत येतकच तांणी कोंकण रेल्वे पुलिसां कडेन संपर्क सादलो. पुलिसांनी रोखडोच करमळी स्टेशनार रेल्वेंत सोद घेतले उपरांत चल्याक परतून कुटुंबाचे सुवादीन केलो.
मेळिल्ले म्हायती प्रमाण उत्तर प्रदेशांतल्यान एका कुटुंबांतले वट्ट णव जाण स वर्सां पिरायेच्या चल्या सयत गोंयांत आयिल्लें. गोंय भोंवून हें कुटूंब बिरेस्तारा उत्तर प्रदेशांत वचपा खातीर वतालें. ह्या कुटुंबान उत्तर प्रदेशांत वचपा खातीर रेल्वेचें तिकेट बूक केल्लें. बिरेस्तारा रातीं तांणी बुकींग केल्ली रेल्वे उसरां धांवताली. ताका लागून कुटुंबान मडगांव रेल्वे स्टेशनारूच गाडयेची वाट पळयत रावपाचो निर्णय घेतलो.
हें कुटूंब रेल्वे स्टेशनार गाडयेची वाट पळयत आसतनाच रेल्वे स्टेशनार मंगळुरू सावन मुंबय वचपी मुंबय सीएसटी सुपरफास्ट ही गाडी सवाय णव वरांच्या सुमाराक आयली. पर्यटना खातीर आयिल्ल्या कुटुंबांतल्या स वर्सा पिरायेच्या चल्याक ही आपलीच गाडी आशिल्ल्याचें दिसलें आनी तो ते गाडयेंत चडलो.
थोड्याच वेळांत ही गाडी स्टेशना वेल्यान सुटली. पूण आपलो चलो ते गाडयेंत चडिल्ल्याचें त्या पर्यटक कुटुंबाक खबर नाशिल्लें. जेन्ना पर्यटकांक चलो ते गाडयेंतल्यान गेल्ल्याचें लक्षांत आयलें त्या वेळार तांणी धांवपळ सुरू केली. पर्यटकांनी कोंकण रेल्वे पुलिसां कडेन संपर्क सादलो. कोंकण रेल्वे पुलिसांनीय रोखडीच हाचेर कार्यवाही सुरू करून खंयची गाडी स्टेशनार आयिल्ली हाची म्हायती करून घेतली. उपरांत फुडलें स्टेशन आशिल्ल्या करमळी पुलिसांक हाची म्हायती दिली.
ते प्रमाण करमळे ती गाडी रावले उपरांत पुलिसांनी त्या चल्याचो सोद घेवन ताका रेल्वेंतल्यान सकयल देंवयलो. उपरांत ताका मडगांवां हाडून त्या कुटुंबांचे सुवादीन केलो.
कोंकण रेल्वे पुलीस निरिक्षक सुनील गुडलर हांच्या मार्गदर्शना खाला कॉन्स्टेबलर ब्रिजेश नायक, राघेश नायक, पुलीस कॉन्स्टेबल मंजुनाथ, दीप्तेश केरकार हांणी ह्या सोदकार्यांत वांटो घेतिल्लो. ह्या कुटुंबान कोंकण रेल्वे पुलिसांच्या प्रतिसादाक लागून आपलो चलो परतून मेळिल्ल्याचें सांगून गोंय पुलिसांचें उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
