भांगरभूंय | प्रतिनिधी
एआय वरवीं एका मिनटांत 1.25 लाख तिकिटे जातल्यो बूक
नवी दिल्ली: भारतीय रेल्वे प्रवासी आरक्षण पद्दत पुरायपणान सुदारता. ह्या व्हड बदला उपरांत रेल्वेच्या नव्या बुकींग पद्दतींत दर मिन्टाक १.२५ लाख तिकेटी बुक करपाक मेळटल्यो. सद्याचे क्षमतेक लागून हें पुराय ५ पटींनी चड आसा.
सध्या रेल्वे वेवस्था एका मिण्टांत फकत २५ हजार तिकीटांचेर प्रक्रिया करूंक शकता, जाका लागून प्रवाशांक बेगोबेग बुकींग वा चड लोडाच्या वेळार त्रास जातात. सेंटर फॉर रेल्वे इन्फॉर्मेशन सिस्टम्स (सीआरआयएस) हांणी आपल्या ४१व्या स्थापन दिसा ही म्हायती दिल्या.
नवी पद्दत वाडत आशिल्ली मागणी पुराय करतली, हँग जावपाची समस्या उणी जातली
सीआरआयएसाच्या म्हणण्या प्रमाण तिकीट बुकींग क्षमतेंतूय ५ पटींनी वाड जाल्ल्यान हे पद्दतीचे कार्यक्षमतेंत व्हड सुदारणा जातली. हाका लागून भारतीय रेल्वेक प्रवाशांच्या आरक्षणाची वाडत आशिल्ली मागणी नेटान पुराय करपाक मेळटली.
सादारण प्रवाशांची आतां तात्काळ तिकीट बुक करतना ऍप वा वेबसायटी सेगीत हँग जावपाच पसून सुटका मेळटली अशी अपेक्षा आसा.
सुपर रेलवन ऍप: ४.३५ कोटी वयर डावनलोड
फाटल्या वर्सा सुरू जाल्लो रेल्वेचो सुपर ऍप ‘रेलवन’ लोकांक खूब आवडटा अशें अधिकार्यांनी सांगलें. ताची सादी रचना प्रवाशांक बरो अणभव दिता. आतां मेरेन तो ४.३५ कोटी परस चड वेळां डावनलोड जाला आनी दर दिसा सरासरी १० लाख वेव्हार ह्या ऍपाचेर जातात.
रेल्वेंत एआय तंत्रगिन्यानांत कितें बदल जातलो
रेल्वे आतां आपलें काम बरें आनी सुरक्षीत करपा खातीर आर्टिफिशियल इंटेलिजन्स (एआय) तंत्रज्ञान वापरता. हाचे वांगडा गाडयो मोडून पडचे पयलींच गाडयो सारक्यो करपाचें काम करतले, जाका लागून अपघात जावचे नात आनी सुरक्षीतताय घटमूट जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
