रेंवेची बेकायदो येरादारी करपी ट्रक जप्त

बेकायदो रेंव काडून येरादारी करपी जप्त केल्ल्या ट्रका वांगडा मामलेदार प्रवीण गांवस, पुलीस आनी खण खात्याचे अधिकारी.

भांगरभूंय | प्रतिनिधी

म्हापशें: भरणवाडो कामुर्ले शापोरा न्हंयेंतल्यान बेकायदो रेंव काडून ताची येरादारी करपी ट्रक कोलवाळे धरलो. त्या ट्रकांत 3 घनमिटर रेंव आशिल्ली. ह्या ट्रका सयत पुलिसांनी रेंव जप्त केली.

पुलिसांनी ही कारवाय शेनवारा सकाळीं केली. कामुर्लेच्यान ट्रकांतल्यान रेंवेची येरादारी जाता अशी खबर पुलिशेक मेळिल्ली. ते प्रमाण उपअधिक्षक जिवबा दळवी आनी निरिक्षक सोमनाथ माजीक हांच्या मार्गदर्शना खाला उपनिरिक्षक मंदार नायक हांच्या फुडारपणा खाला पुलीस पंगडान भरवणवाड्यार सांपळो रचलो.

ह्या वेळार जीए 03 के 2220 नंबराच्या ट्रकांतल्यान बेकायदो तरेन काडिल्ले रेंवेची येरादारी करतले. तो ट्रक पुलीस पंगडान आडायलो. ही म्हायती घोळट्या पंगडाक दिली. बार्देस मामलेदार प्रवीण गांवस आनी खण विभागाचे अधिकारी घडणुकेचे सुवातेचेर दाखल जाले. ह्या प्रकरणांत गुन्यांव नोंद करून ट्रक आनी रेंव जप्त केली. तशेंच ट्रक चालक आनी ट्रक धनयाक नोटीस जारी केल्या.