भांगरभूंय | प्रतिनिधी
ग्रामसभेंत पंचायतीन दिली म्हायती
मडगांव, प्रतिनिधी : रुमडामळ- दवर्ली पंचायतीचे ग्रामसभेंत हावजींग बोर्ड वाठारांतल्या बेकायदेशीर बांदकामाचो मुद्दो ग्रामस्थांनी मांडलो. ह्या वेळार पंचायतीन हीं बांदकामां बंद करून कारणां दाखयात अशी नोटीस धाडल्या, अशें स्पश्ट केलें.
ग्रामसभा आयतारा पंचायतीच्या सभाघरांत जाली. सरपंच मुबिना फनीबंध हांचे अध्यक्षते खाला जाल्ले हे बसकेक अंदूंच्यो अर्थसंकल्पांतल्यो तरतुदी मांडल्यो. ह्या वेळार पंचायतीच्या उत्पन्ना विशीं विचारलें. तेन्ना सोपो कंत्राट पंचायत काडटा आनी तें कंत्राट मेळिल्ले व्यक्ती कडल्यान सोपो घेतात अशें सांगलें. तेन्ना बेकायदो वेवसाय करप्यां कडल्यान पयशे घेतिल्ल्यान ते पंचायतीक पयशे दिल्ल्याचें सांगून वेवसाय करतात अशें ग्रामस्थांनी सांगलें. तेन्ना पंचायतीच्या उपन्नाचेर आनी खर्चाचेर चर्चा जाता अशें सचिवांनी स्पश्ट केलें. उपरांत पंचायतीचो अर्थसंकल्प सादर करून कोणाचीच हरकत नाशिल्ल्यान मंजूर केलें.
तशेंच ग्रामविकास कामां विशीं ह्या वेळार म्हायती दिली. आनीक कामां करपाचीं आसात? हे विशीं विचारतात. सध्याच्या ग्रामविकास कामांत एमआरएफ शेडी लागसारा वर्मीकंपोस्ट प्रकल्प उबारप, शेडीचेर सोलर पॅनलाची उभारणी, गांवचो बागो नितळ करप, त्यो रंगोवपा वांगडा सरकारी शाळो आनी बागेचें सामान विकतें घेवप, भलायकी आनी कोयर समस्ये विशीं जागृताय करप, गटारांचीं कामां करपाचें थारलां, अशें ह्या वेळार सांगलें.
ग्रामसभे वेळार कांय ग्रमास्थांनी पंचायत वाठारांतल्या बेकायदो कामांचो मुद्दो हाजीर केलो. कागाळ केल्या मात आजूनय कांय कामां सुरू आशिल्ल्याचें तांणी सांगलें. तेन्ना पंचायतीन ह्या कामांक काम बंद उडोवपा वांगडा कारणां दाखयात नोटीस जारी केल्यात. तशेंच हावजींग बोर्ड कार्यालयाकूय हाची म्हायती दिल्या. ताचेर कारवायेची प्रक्रिया सुरू आसा, अशें सांगून परत पत्र धाडटले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
