भांगरभूंय | प्रतिनिधी
बसकेंत थारावः बिगरभंडारी समाजाचो हस्तक्षेप खपोवन घेवचे नात
भांगरभूंय । प्रतिनिधी
दिवचलः हरवळेंच्या श्री रुद्रेश्वर देवस्थानाचे घटने प्रमाण हें देवूळ आनी ह्या देवळांतले सगळे वेव्हार हाचेर फक्त भंडारी समाजाचोच अधिकार आसा. हेर समाजां खातीर परंपरे प्रमाण आशिल्लो मान तांकां मानान दितले. पूण देवस्थानाच्या वेव्हारांत आनी कार्यांत बिगर भंडारी समाजाचो कसलोच हस्तक्षेप खपोवन घेवचे नात, असो एकमुखी थाराव हरवळ्यां जाल्ले दिवचल आनी सत्तरी म्हाल भंडारी समाजाचे बसकेंत घेतलो.
यशवंत माडकार आनी काशिनाथ मयेंकार हांचे अध्यक्षते खाला जाल्ले बसकेंत संजीव नायक, अॅड. अनीश बकाल, अमृत आगरवाडेकार, किशोर नास्नोडकार, रोहन कळंगूटकार, बी. जी. नायक, सुभाष किनळकार आनी हेरांनी आपले विचार मांडले.
महाशिवरात्री दिसा श्री रुद्रेश्वर देवळांत बोवाळ करपी सगळ्यांचेर देवस्थान समिती वतीन दिवचल पुलीस स्टेशनांत फौजदारी गुन्यांव दाखल करतले, असोय थाराव हे बसकेंत घेतलो. हो थाराव अॅड. अनीश बकाल हांणी मांडलो आनी संजीव नायक (पर्वरी) हांणी ताका अनुमोदन दिलें. ह्या थारावाक सगळ्यांनी हात वयर करून समर्थन दिलें.
श्री रुद्रेश्वर देवस्थानाचे घटने प्रमाम ह्या देवळांतले सगळे अधिकार हे भंडारी समाजा कडेच आसत. तातूंत हेर कोणूच हस्तक्षेप करपाक शकना. हे मुखार असो हस्तक्षेप खपोवन घेवचो न्हय, असो थाराव संजीव नायक हांणी मांडलो. ताका किशोर नास्नोडकार हांणी अनुमोदन दिलें. सगळ्यांनी हात वयर काडून ह्या थारावाक समर्थन दिलें.
रुद्रेश्वर देव हो सगळ्या भक्तांचो. रुद्रेश्वर देवाचें दर्शन आनी पुजाअर्चा सगळ्या समाजांतल्या भाविकां खातीर उक्ती आसा. महाशिवरात्री दिसा गर्भकुडीडंत श्री रुद्रेश्वर देवाक अभिशेक करपाक मेळटा. थंय देवस्थाना वतीन कसलीच हरकत आसना. पूण श्री रुद्रेश्वर देवस्थानाच्या अधिकार कार्यक्षेत्रांत बिगरभंडारी समाजान लुडबूड केली जाल्यार हो प्रकार केन्नाच सोंसून घेवचे नात, अशें यशवंत माडकार हांणी भर दिवन सांगलें.
हरवळें सांखळेच्या श्री रुद्रेश्वर देवस्थान सभामंडपांत जाल्ले बसकेक दिवचल आनी सत्तरी म्हालांतल्या भंडारी समाजाच्या भावां सयत बाराय म्हालांतले भंडारी भाव हाजीर राविल्ले. गोंय राज्यांतल्या भंडारी समाज भावांक 20 टक्के आरक्षण मेळचें तशेंच गोंयांतल्या ओबीसींची जनगणना करची, असो थाराव उपेंद्र गांवकार हांणी मांडलो. ह्या थारावाक लेगीत सगळ्यांनी समर्थन दिलें. तशेंच दर म्हयन्याचे पालखी मिरवणुकेक हरवळ्यां भंडारी समाजांतल्या लोकांनी व्हड संख्येन एकठांय येवन थाटांत हो सुवाळो मनोवचो. हे खातीर पुराय गोंयभरांतल्यान येरादारी वेवस्था तशेंच महाप्रसादाची वेवस्था करपाचें, हे बसकेंत थारायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
