भांगरभूंय | प्रतिनिधी
भांगरभूंय । प्रतिनिधी
दिचचलः कुडण्यांतलो देव कुडणेश्वर व्हो हरवळेंतल्या रुद्रेश्वरराचो व्हडलो भाव आशिल्ल्यान रुद्रेश्वर देवाच्या महाशिवरात्री उपरांत दुसऱ्या दिसा फातोडेर पयलें दिवज पेटोवपाचो आनी रथाचेर श्रीफळ वाडोवपाचो मान परंपरे प्रमाण कुडण्यांतल्या गांवकार म्हाजनांचो आसा. तो मान आनी हक्क आमचे कडल्यान कोणीय झोमून घेवपाक शकना. आमका हरवळेच्या रुद्रेश्वर देवस्थानाच्या म्हाजनकींत कसलेंच स्वारस्य ना. तातूंत आमी केन्नाच हस्तक्षेप केलो ना. मात आमचो मानाच्या आड कोणूय आयल्यार आमी ओगी रावचे नात अशें कुडणेश्वर देवस्थान समिती आनी म्हाजनांनी एके पत्रकार परिशदेंत सांगलें.
हरवळ्या शिवरात्री वेळार कुडणेश्वर देवस्थान म्हाजनांनी बळग्या रुद्रेश्वर देवळांत तांका नाशिल्लो मान आनी हक्क हे खातीर गोंदोळ घातलो अशी खबर सोशल मीडियारेच व्हायरल जाल्ली. ते संबंदांत आपली भूमिका आनी स्पश्टिकरण देवस्थान समिती आनी म्हाजनांनी पत्रकार परिशदेंत समिती अध्यक्ष उदय शिवराम मळीक, सचीव अर्जुन मळीक, भांडारी कृष्णा मळीक, उपाध्यक्ष गोकुळदास मळीक, महादेव मळीक हाणी दिलें.
कुडणेश्वर देवस्थानाचो ज्येश्ठ महाजन आनी आदलो मंत्री सदानंद मळीक हाणे कुडणे आनी हरवळें गांवातल्या सांस्कृतीक, इतिहासीक आनी धर्मीक रुढी आनी परंपरा हाची म्हायती पत्रकारांक दिली. कुडणे गांवाची व्याप्ती पयलींच्या तेपार व्हडली आशिल्ली. कुडणेश्वर देवस्थानाक हरवळेंतली सगली देवळां संलग्न आसात. तातूंत कुडणेतल्या गांवकारांक वेगवेगळे मान आसात आनी दरेका देव कामांत ते परंपरे प्रमाण दितात अशें मळीक हांणे सांगलें.
दर वर्सा कुडणेतल्या जात्रे वेळार हरवळेच्या रुद्रेश्वरा कडल्यान कुडणेश्वराक फुलां धाडटात. शिगम्याक हरवळेंतल्या गांवकारां वतीन होळी कुडण्या हाडटात. कुडण्यात हाडचे पयलीं ती रुद्रेश्वरा कडेन व्हरून सांगणे करतात. ते ऱातीं हरवळेंतले गांवकार गड उत्सवांत वाटो घेतात आनी दुसऱ्या दिसा चोरोत्सव जाल्या उपरांत आपल्या गांवात वतात. शेंकड्यांनी वर्सा सावन ही प्रथा परंपरा आसा. आज मेरेन कुडणे, खालचें आनी वरचें हरवळे हांगच्या देवाचे उत्सव, मान, अधिकार चलतात अशी म्हायती सदानंद मळीक हाणे दिली.
कुडण्यांतल्या गांवकार म्हाजनाक हरवळ्या शिवरात्रीच्या दुसऱ्या दिसा परंपरे प्रमआ दिवजां आनी रथा वेळार श्रीफळ वाडोवपाच्या आमच्या अधिकारा पसून आमकां पयस दवोरपाचो प्रकार पोरूं आनी ह्या वर्सा जालो. कुडण्यांतल्या गांवकारांक कसलेच तरेचो मान ना असो दावो रुद्रेश्वर देवस्थान समिती करता. ते खातीर 1926 वर्सा तयार केल्ले घटनेचो आधार घेता. मात ते घटनेक आमचो आक्षेप आसा अशें ताणे सांगलें. रुद्रेश्वर देवस्थानाचे म्हाजन जावपाचो वा देवूळ ताब्यांत घेवपाचो आमचो निखालस उद्देश ना. मात पूर्वापार पसून चलंत आयिल्ल्यो रुढी आनी प्रथा मोडपाचो कोणेच यत्न करपाक जायना. आमचो परंपरागत मान झोमून घेवपा फाटल्यान रुद्रेश्वर देवस्थान समितीचो कसलोय तरी हेत आसपाक शकता. मात आमचो परंपरागत मान आनी हक्क हाच्या आड कोणीय आयल्यार आमी ताका कायद्याच्या कक्षेंत रावन विरोध करतले अशें कुडणेश्वर म्हाजनांनी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.