भांगरभूंय | प्रतिनिधी
नवी दिल्ली, खबरां संस्थाः नॅशनल टेस्टिंग एजन्सी (NTA) शेनवारा देशभरांत गोंयां सयत हेर राज्यांनी परतून जावपी नीट-यूजी परिक्षे पयली मॉक ड्रिल करतली. परिक्षा सुरक्षीत आनी पारदर्शक करपा खातीर पुलीस, जिल्लो प्रशासन आनी केंद्रीय एजन्सी हांच्या सहकार्यान मल्टी लेयर सुरक्षेची वेवस्था केल्या.
आयतारा, 21 जुनाक परतून जावपी परिक्षेक 22.79 लाखां परस चड विद्यार्थी बसतले. हाचे खातीर भारतांतल्या 551 शारांनी आनी विदेशांतल्या 14 शारांनी 5000 परस चड परिक्षा केंद्रां स्थापन केल्यांत. एनटीएच्या म्हणण्या प्रमाण, ही परिक्षा घेवपा खातीर 2 लाखां परस चड कर्मचारी, 674 सिटी कोऑर्डिनेटर आनी 6,669 निरिक्षकांची नेमणूक केल्या.
एनटीएच्या म्हणण्या प्रमाण ही परिक्षा दनपारां 2 ते 5:15 मेरेन पेन-अँड-पेपर पध्दतीन जातली. दिव्यांग आनी अशक्त उमेदवारांक अतिरिक्त वेळा सयत सांजेच्या 6:20 वरां मेरेन परीक्षा बरोवपाक मेळटली.
मजगतीं, पुराय गोंयांत 4500 विद्यार्थी नीट परिक्षेक बसतले. उत्तर गोंयांत 8 जाल्यार दक्षीण गोंयांत 4 मेळून 12 केंद्रांनी परिक्षा जातली. उत्तर गोंयांत चड उमेदवार आशिल्ल्यान परिक्षेची केंद्रां चड आसात. उत्तर गोंयांत 8 परिक्षा केंद्रांनी मेळून 3350 विद्यार्थी परिक्षेक बसतले. दक्षीण गोंयात 4 केंद्रानी 1070 विद्यार्थी परीक्षेक बसतले. विद्यार्थ्यां खातीर कदंबा बशीची खास वेवस्था केल्या. गोंयांत लेगीत परिक्षा केंद्रांनी सीसीटीव्ही कॅमेऱ्यां सयत मोबायल जॅमर्स आसतले. प्रस्नपत्रिका हाडप तशेंच पेपर सोंपल्या उपरांत उत्तर पत्रिका पावोपा खातीर पुलिसां सयत सीआयएसएफ जवानांची लेगीत मजत घेतले. खर सुरक्षा वेवस्थेंत ही परिक्षा जातली.
#NEET #NEET-UG #NEETExam #Goa #NationalTestingAgency #ReExam #ReNEET
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
