भांगरभूंय | प्रतिनिधी
कृष्णा साळकारः वास्कोचे निशेध सभेंत दावो
भांगरभूंय । प्रतिनिधी
मुरगांवः हिंदू धर्मा आड सदांच वेगवेगळे पद्दतीन विधानां करप काँग्रेस फुडारी राहूल गांधी हांच्या रगतांतूच आसा. राहूल हांणी हिंदू धर्मांतली दुर्गा माँ, भारत माता आनी महिला शक्ती आड वायट उतरां वापरून गांधी कुटुंब हिंदू विरोधी आशिल्ल्याचे स्पश्ट केलां. दर खेपे हिंदूंच्यो भावना दुखोवपी राहूल गांधी हांच्या विधानाचो वास्को भाजप मंडळ निशेध करता, अशें वास्कोचे आमदार कृष्णा साळकार हांणी सांगलें. वास्को भाजप मंडळ आनी महिला मोर्चा वतीन महिला शक्ती आड वायट उतरां वापरिल्ले खातीर काँग्रेस फुडारी राहूल गांधी हांचो निशेध केलो.
साळकार हांच्या फुडारपणा खाला जाल्ले बसकेंत वास्को भाजपा गटाध्यक्ष दीपक नायक, दक्षीण गोंय भाजप उपाध्यक्ष जयंत जाधव, जिल्हो पंचायत वांगडी अनिता थोरात, मुरगांवची नगरसेविका शमी साळकार, आदली नगरसेविका रोचना गिरीश बोरकार, संदीप नार्वेंकार, पंकज नायक आनी महिला मोर्चाच्यो वांगडी व्हड संख्येन हाजीर आशिल्ल्यो.
नारी शक्ती आड वायट उतरां वापरून राहूल गांधी हांणी पुराय हिंदू धर्माचो अपमान केला. भारत देश तांच्या विधानाचो खर उतरांनी निशेध करता, अशें साळकार हांणी सांगलें.
राहूल गांधी हांणी हे आदीं लेगीत खूब खेपे हिंदू धर्मा आड अपमान जावपा सारकी भाशा वापरल्या. तांणी पुराय देशांतले नारी शक्तीची माफी मागची, अशी मागणी वास्को भाजपा प्रभारी अनिता थोरात हांणी सांगलें. ह्या वेळार दीपक नायक, जयंत जाधव आनी हेरांनी राहूल गांधी आड आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
