भांगरभूंय | प्रतिनिधी
३ म्हयन्यांत १० लाख झाडां लावपाची मोख
पणजी : ‘एक पेड मॉं के नाम’ ह्या खासा उपक्रमा खाला गोंय सरकार ५ जून ते ५ सप्टेंबर मेरेन पाचवें गोंय, नितळ गोंय ही खासा मोहीम चालीक लावपाचें आसा. हे मोहीमे खाला राष्ट्रीय म्हामार्ग, राज्य म्हामार्ग तशेंच हेर रस्त्यांच्या कुशीक १० लाख झाडां लावपाचो उपक्रम ५ जून सावन सुरू जातलो. मुख्यमंत्री डॉ. प्रमोद सावंत हांणी मंत्रिमंडळ बसके उपरांत ही म्हायती दिली.
राष्ट्रीय म्हामार्गा सयत हेर रस्त्यांच्या कुशीक झाडां लायले उपरांत सगळे रस्ते हरीत वाठार जातले. पर्यावरणाची लेगीत जतनाय जातली, अशें मुख्यमंत्र्यांनी सांगलें. पत्रादेवी हांगा राष्ट्रीय म्हामार्गा कुशीक डॉ. सावंत हे स्वता वचून झाड लावन मोहीमेचो शुभारंभ करतले. पणजे कदंब बसस्टँडाचेरूय झाडां लावपाची कार्यावळ जातली. मडगांव वेस्टर्न बायपास, काणकोण चार रस्तो सयत धा जाग्यांचेर कार्यावळी जातल्यो. सगळे मंत्री, आमदार हे कार्यावळींत वांटेकार जातले, अशें डॉ. सावंत हांणी सांगलें. पिंपळ, वड, जांबळां ह्या झाडां सयत पणस, आंबो ह्या झाडांचें वाटप जातलें. अर्जुन, आवळो हीं झाडां आतां गोंयांत दिसनात. हींय झाडां लायतले. पंचायती, नगरपालिका वांगडी तशेंच सामान्यांनी झाडां लावन मोहीम येसस्वी जावपाक सहकार्य करचें, अशें आवाहन डॉ. सावंत हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
