भांगरभूंय | प्रतिनिधी
पेडणें : राष्ट्रीय महामार्ग ६६ वेलो पत्रादेवी ते धारगळ महाखाजन मेरेनचो रस्तो सामको धोको निर्माण करता. सगल्याक उबारपी उड्डाणपुलांच्या कामांत गरजेची सुरक्षा उपाय येवजण करिनाशिल्ल्यान अपघातांचें प्रमाण बरेंच वाडलां. हाचेर बेगीनूच कितेंय उपाय येवजण जायना जाल्यार पेडणेंकारांक रस्त्याचेर देंवोवन सरकाराक जाप विचारची पडटली, अशी शिटकावणी मिशन फॉर लोकलचे राजन कोरगांवकार हांणी दिली.
राजन कोरगांवकार हांच्या नेतृत्वाखाला शिश्टमंडळान कोलवाळेच्या भौशीक बांदकाम खात्याच्या राष्ट्रीय महामार्ग विभागाच्या अधिकार्यांची भेट घेवन लेखी निवेदन सादर केलें. ह्या वेळार सहाय्यक अभियंता तारी हांचे वांगडा सविस्तर चर्चा केली.
सध्या धारगळ, दोन खांब, वैभव पुरस्कडें अश्या खुबश्या सुवातांचेर उड्डाणपुलांचें काम सुरू आसा. मात हांगा योग्य दिकादर्शक तखटे, येरादारी नियंत्रण वेवस्था, ट्रॅफिक पुलीस तशेंच सुरक्षीत वोल्तांची वेवस्था नाशिल्ल्यान वाहनचालकांक व्हड धोको निर्माण जाला. आतां मेरेन ह्या मार्गाचेर खुबशे अपघात जाल्ल्यान कांय जाणांक आपलो जीव वगडावचो पडला. ह्या बळींक जापसालदार कोण? असो प्रस्न कोरगांवकार हाणी उक्तायलो.
महामार्गावेलें जंक्शन आनी ब्लॅक स्पॉट म्हणून वळखपी सुवातेर सर्कल पद्धतीन काम करून येरादारी सुरळीत करची, ट्रॅफीक सिग्नल बसोवचे तशेंच येरादारी पुलीस तैनात करचे, अशी मागणी तांणी केली. सेगीत जावपी येरादारी कोयंडी आनी अपघात आडावपा खातीर संबंदीत विभागान सदांच महामार्गाची पळोवणी करची, अशी सुचवणीय तांणी केली.
ह्या वेळार राजन कोरगांवकार हांणी आदले प्रधान अभियंता उत्तम पार्सेकार हांच्या कार्यकाळांत महामार्गाचें काम सामक्या वायट दर्जाचें जाल्ल्याचो आरोप केलो. अधिकारी हे २० ते २५ वर्सां सेवेंत आसतात. हाका लागून तांणी फकत राजकारण्यांच्या शब्दाचेर चलनासतना जनहित लक्षांत घेवन जापसालदारकेन काम करपाक जाय, अशेंय तांणी म्हणलें.
दोन खांब वाठारांतल्या धोक्याचे स्थितीविशीं खासदार सदानंद शेट तानावडे हांणी ह्यान पयलीं अधिकार्यां कडेन चर्चा करून बेगोबेग उपाय योजना करपाची मागणी केल्ली. तरीय आयज मेरेन खर कार्यवाही कित्याक जावंक ना, असोय प्रस्न कोरगांवकार हांणी केलो.
ह्या निवेदनाचेर योग्य अंमलबजावणी करून गरजेचे उपाय करतले, अशी गवाय सहाय्यक अभियंता तारी हांणी दिली.
ह्या वेळार राजू नरसे, सुनील नायक, आदले सरपंच रुपेश परब, दिलीप हरमलकार, राजन पार्सेकार आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
