भांगरभूंय | प्रतिनिधी
विरोधकांनी खेळा मंत्र्यांक उजरायलो, चवकशेची मागणी
पणजी, प्रतिनिधी : राष्ट्रीय खेळां सर्तीच्या खर्चांत गैरवेव्हार जाल्ल्याचो आरोप करतनाच विरोधकांनी बुधवारा खेळा मंत्री गोविंद गावडे हांकां उजरावन काडलो. आमदार वेंंझी व्हिएगस आनी विरोधी पक्ष फुडारी युरी आलेमांव हांंणी खर्चाचे चवकशेची मागणी केली. निवृत्त न्यायाधीशा वरवीं चवकशी करपाची मागणी आमदार वेंझी व्हिएगस आनी युरी आलेमाव हांंणी केली.
राष्ट्रीय खेळां सर्तीचेर ४४५ कोटी रूपया खर्च जाले. २०१४ सावन राष्ट्रीय खेळा सर्तीची तयारी सुरू आशिल्ली. २०१४ उपरांंत ५७३ कोटी रूपया खर्च जाले. हातुंतलीं कांय कामां लुसोफोनिया सर्ती खातीर जालीं. राष्ट्रीय खेळां सर्ती खातीर ४४५ कोटी खर्च जाला. हातूंतले १६१ कोटी रुपया सरकारान फारीक केल्यात. १८० कोटी रूपया फारीक करपाचे आसात, अशी म्हायती खेळां मंत्री गोवींद गावडे हांंणी दिली.
नेहरू स्टेडियमाची दुरूस्ती, हेर मैदानांची दुरूस्ती, जायरातींचो मेळून हो खर्च जाला, अशेंं खेळा मंत्र्यांंनी सांंगलें. विरोधी पक्ष फुडारी युरी आलेमाव आनी वेंझी व्हिएगस हांणी गैरवेव्हाराचो आरोप करीत चवकशेची मागणी केली. हे चर्चेंत मुख्यमंत्री डॉ. प्रमोद सावंत हांंणी हस्तक्षेप केलो. २०१४ वर्सा सावन मुळाव्यो सुविधायो उबारपाचीं कामां सुरू आशिल्लीं. सगळ्या कामांचेर इतलो खर्च जावप साहजीक आसा, अशें मुख्यंत्री डॉ. प्रमोद सावंत हांणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
