भांगरभूंय | प्रतिनिधी
लेफ्टनंट कर्नल डॉ. विनोद ज्ञानेश्वर साळकार (सेवानिवृत्त) हे मे 2008 सावन वेरें रेईस मागुस वैजकी वेवसाय करतात. 1988 वर्सा गोवा मेडिकल कॉलेजींतल्यान तांणी एमबीबीएस पदवी घेतल्या. तांणी 21 वर्सां लश्करी वैजकी पथकांत काम केलें. १९८७ वर्सा इंटर्नशिप करतना तांकां लेफ्टनंट म्हणून कमिशन मेळ्ळें आनी फुडल्या सेवेच्या काळांत तांणी म्हत्वाचीं कामां सांबाळ्ळीं.
१९८८- ८९ ह्या काळांत श्रीलंकेंत भारतीय शांतीसेनेच्या सैनिकांक वैजकी सुविधा दिवन तांचें प्रतिनिधीत्व केलें. १९८९- ९१ ह्या काळांत पंजाब पाकिस्तान शिमेचेर सैन्य बटालियनांत काम केलें. निमाणें १९९१- १९९५ मेरेन सशस्त्र दळ वैजकी म्हाविद्यालय पुणें हांगा पदव्युत्तर पदवे खातीर निवड जाले उपरांत १९९५-९८ मेरेन तांची लश्करी हॉस्पिटल रेफरल आनी संशोधनांत नेमणूक जाली. १९९९ वर्सा कारगिल झुजांत ऑपरेशन विजया खातीर तांकां कामां दिली. १९९९- २००१ मेरेन अस्तंत आफ्रिकेंतल्या सिएरा लिओनांतल्या संयुक्त राष्ट्रांच्या शांतताय राखण मिशनांत प्रतिनिधीत्व केलें. तशेंच कमांड हॉस्पिटल पुण्यां 2002- 2005 वर्सां रजिस्ट्रार म्हणून काम केलें.
लेफ्टनंट कर्नल डॉ सळकर हांणी 2005- 2006 मेरेन श्रीनगरांतल्या 92 बेस हॉस्पिटलांत आनी 2006- 2008 वर्सा लश्करी मुख्यालय नवी दिल्लींत संयुक्त संचालक सशस्त्र दळ वैजकी सेवा म्हणून काम केल्लें.
लश्करांतल्या बरे सेवे खातीर तांकां 2005 वर्सा लश्करी सेनापती (GOC in C of southern command) कडल्यान तोखणाय कार्ड फावो जालें.
रेश्मा साळकार (बाणावले) ही तांची घरकान्न. तांची व्हडली धूव डॉ. श्रुतिका अभिषेक तार, डेंटल सर्जन. ती ऑक्टोबर 2021 सावन वेऱ्यां साळकार- तार डेंटल क्लिनिक चलयता. धाकटी धूव डॉ. सिया साळकारान गोंय दांत महाविद्यालय आनी हॉस्पिटलांत बीडीएस पदवी मेळयल्या आनी सध्या एसडीएम कॉलेज धारवाडांत प्रोस्थोडॉन्टिक्सांत एमडीएस करता.
राष्ट्राची सेवा म्हणल्यार देवाची सेवा अशें लेफ्टनंट कर्नल डॉ. साळकार म्हणटात. ‘तरणाटे पिळगेन सदांच लश्करांत वचपाचो एक पर्याय म्हणून दवरचो पडटलो. युनिफॉर्मांत राष्ट्राची सेवा करपाचो व्हड अभिमान. कारण तातूंतल्यान तुमकां शिस्त मेळटा, फुडारपणाचे गूण विकसीत जातात, थारायिल्ल्या काळांत इत्सा आशिल्लीं ध्येयां साध्य करपाक आत्मविस्वास मेळटा आनी चड करून तुमकां सगळो वेळ मनीसपणान रावपाक शिकयता. जेन्ना तरणाट्या वर्दीक लागून फिटनेस पयल्या क्रमांकाचेर दवरपा खातीर घाम येता आनी ताचे परिणाम निवृत्ती उपरांत लेगीत तुमचे बरे भलायकेचेर पळोवंक शकतात.’ तरणाट्यांक दिल्लो हो संदेश स्पश्ट आसा ‘संरक्षण सेवांचो भाग जावचें, वर्दी घालची आनी ताचे खातीर बेगीन तयारी करची.’
सलाम फौजी
जॉन आगियार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
