भांगरभूंय | प्रतिनिधी
आयज संवसारांत आमचो देश सगल्या मळांचेर व्हडा नेटान पर्जळटा. हाचें स्रय देशांतल्या दरेका घटकाक वता. आमच्या देशांतलो दरेक नागरीक, देशांतली दरेक संघटना, साबार संस्था, सरकारी आनी बिगर सरकारी आस्थापनां हांच्या एकात्मिक येत्नांक लागून आयज देश यशाची पावलां मारपाक शकता. मात, ह्या सगल्या घटकांक तांचें काम वेवस्थितपणान करप शक्य जाता तें म्हळ्यार देशाच्या सक्षम आनी सतर्क अशा सैन्यदळाच्या बळग्यार. आमच्या देशाची सैन्यदळां दीसरात झुजापावंड्यार वावुरतात देखून आमी सगले देशाच्या विंगड विंगड सुवातांनी सुखान, समाधानान आनी निश्चिंतपणान जगपाक शकतात, आमची कामां करपाक शकतात. सैन्यदळां आपलें व्यक्तीगत जीवन विसरून आमच्या सगल्यां खातीर लडटा देखून आमी आमची सपनां पुराय करपाक सहजपणान मुखार सरपाक शकतात. ह्याच सैन्यदळाविशींचो आमच्या मनातलो आदर आनी तांचेप्रती आशिल्ली आमची लागणूक आमी विसरूंक फावना. तशेंच ह्या सैन्यदळांत आमच्यातल्या दरेकल्यान योगदान दिवपाची आयज गरज आसा.
आमचो देश संवसारातल्या सगल्यात व्हड देशां मदी आसा आनी देखून ह्या देशा मुखार संख्यात्मक नदरेन कितलींशीच व्हड आव्हानां आसात. सैन्यदळां ह्या आव्हानां आड लडपाक फकत शक्त दिनात जाल्यार ती व्हड मर्गदर्शकाचेंय काम करतात. देशा भितर आसू वा देशाच्या शीमेर, खयच्याय तरेच्या संकश्टाचो फुडो करपाक सैन्यदळां सदांच आघाडेर आसतात. आयज मेरेन देशान जायती झुजां लडलीं तातूंत ह्या सैन्यदळांनी आपली क्षमता आनी लागणूक समर्थपणान दाखोवन दिल्या. फकत भारताच्याच संदर्भात न्यय जाल्यार हेर इश्ट देशांच्या उल्तयाक मान दिवन आमच्या सैन्यदळांनी हेर राष्ट्रांनी लेगीत मजत केल्या. सैन्यदळांच्या ह्याच कृतीक लागून देशाचें नातें हेर देशांकडेन आनीक घटमुट जावपाक पावलां.
सैन्यदळां फकत झुजाच्याच प्रसंगांत म्हत्त्वाची भुमिका घेतात अशें न्हय जाल्यार सैमिक संकश्टांच्या वेळार लेगीत तांची भुमिका खूप मोलादिक आशिल्ली आमी अणभवल्या. भूंयकांप, वादळ, चक्रीवादळ, त्सुनामी, हुंवरा सारक्या प्रसंगां वेळार मजत वावरा खातीर देशातल्या साबार सैन्यदळांकच आपोवणे धाडटात. ह्या प्रसंगांक तोंड दिवपाचें काम लेगीत सैन्यदळां तितल्याच बरे तरेन करतात आनी देखून देशातलो दरेक नागरिक हे खातीर तांचो उपकारी आसा.
सैन्यदळांत वावर करप म्हळ्यार व्हड देशसेवा. भारता सराक्या देशाक आयज सैन्यदळांत काम करपाक सोदपी कितल्याश्याच तरणाट्यांची आनी लोकांची व्हडा प्रमाणात गरज आसा. लश्कर, नौदळ, हवाईदळ ह्या मुखेल फांट्यां सयत हेर विभागानी आयज लाखानी सुवातो रित्यो आसात. भारता सारक्या अवाढव्य देशाक ही परिस्थिती परवडपा सारकी ना. आमच्या देशाची भौगोलिक परिस्थिती आनी ताचो आटाप पळयलो जाल्यार ही खर्यांनीच हुस्को करपा सारकी गजाल आसा हें आमी मान्य करतले. दोंगर, न्हंयो, देंगणां, जुंवे, म्हासागर अशा साबार भौगोलिक विविधतांयें कडेन जुळोवन घेवन काम करप म्हाकठीण. मात आमचें सैन्यदळ हें आव्हान सहजपणान पुराय करता ताचें कारण तांची शिस्त आनी देशा विशींचो जाज्वल्य अभिमान.
आयज सैन्यदळांत जायत्यो सुवातो रित्यो आसात तें जालेंच, पुण काळा प्रमाण, परिस्थिती प्रमाण आयज नवी- नवी मळां मुखार येतात. सैन्यदळांतल्या ह्या मळांचेर वावर करपाक विंगड विंगड क्षमतेच्या लोकांची साप्प आवश्यकता आसा. आमच्या देशात साबरा तरेच्यो क्षमता आनी कौशल्यां आशिल्ले लोक आसात. तांच्या ह्याच क्षमतांचो वापर जर सैन्यदळा खातीर जावपाक शकलो जाल्यार ती दरेकल्या खातीर अभिमानाची गजाल थारतली. सैन्यदळां भितर प्रत्यक्ष झुज करपाच्या कामा वांगडाच धोरणा आनी आखणी करप, तंत्रिक देखभाल, अंतरराश्ट्रीय संबंध सुदारपा खातीर वावर करप, सैनिक आनी अधिकार्यांचें प्रशिक्षण, सामरिक संशोधन आनी सुदारणा, सैन्यदळ प्रशासन अशा कितल्याश्याच फांट्यांनी वावर करपाची संद मेळटा.
सरकारान हालींच मुखार हाडिल्ल्या अग्नीपथ येवजणेचो विचार केल्यार अशी वेवस्था आमच्या देशा खातीर भोव आवश्यक आसा. सैन्यदळां आसूं वा निमलश्करी दळां, अशा मळांचेर काम केल्ल्या मनशाचो व्यक्तिमत्त्व विकास एका वेगळ्याच पावंड्यार पावता. शिस्त आनी समर्पण हांच्या जोड भावनेन मनीस व्हडा प्रमाणात वावर करपाक लागता. ह्या देशाकडेन आपली लेगीत एक लागणूक आसा ही गजाल सैन्यदळांत वावुरल्या उपरांत अदिक प्रकर्शान जाणवता.
हेर देशां भितर दरेका नागरिकाक उणेच कांय वर्सां सैन्यदळांत वावर करपाची सक्ती आसता. तशी वेवस्था आमच्याय देशांत हाडपाक जाय. आमच्या देशांतले जायते तरणाटे आयज नोकरी- वेवसायाच्या सोदांत आसतातच. तांकाय ह्या निमतान एक दिशा मेळटली आनी तांच्या क्षमतेचो बरो वापर देशा खातीर जातलो. अशा तरेच्या येवजणेची अंमलबजावणी करतना दरेका घटकाचो, वाठाराचो विचार मात जावपाक जाय. अशे तरेन सेवा दिवपाक इत्सुक आशिल्ल्यांक योग्य तो मोबदलो मेळपाची वेवस्था करची पडटली. हेर देशां भशेन आमच्याय देशांत सक्तीची सेवा कितले वर्सांची आसची ह्या मुद्द्याची निश्चिती चर्चे वरवी करूं येता. मात अशी सेवा दिवप्यांक, सेवाकाळा उपरांत फावो ते प्राधान्य दिल्यार तांकाय उर्बा मेळटली.
खंयचीय येवजण लागू करतना ताची कार्यवाही योग्य पद्दतीन जावप हेंच सगल्यात व्हड आव्हान आसता. हो देश आमचो सगल्यांचो, तशींच सैन्यदळां लेगीत आमचींच. देखून सैन्यदळां भितर वावुरपाची जापसालकी देशाच्या दरेका वाठार, दरेका प्रांत, दरेका समुदायान उखलपाक जाय. सैन्यदळां भितरची सद्याची परिस्थिती पळयल्यार कांय प्रदेशांतलें मनीसबळ चड प्रमाणात आशिल्लें जाल्यार कांय प्रदेशांतल्यान साप्प उणे प्रतिनिधित्त्व आमकां दिश्टी पडटा. देशाचे अश्टताशी उदरगती खातीर दरेका मळाचें योगदान भोव आवश्यक आसा. मात ह्या सगल्यांक सुरक्षित दवरपी सैन्यदळ त्यापरस चड म्हत्त्वाचें. दुरीग घटमुट आसल्यार शेताची राखण करप सोपें जाता, ह्या तत्त्वान विचार करून दरेकल्यान ह्या सैन्यदळां भितर आमचें यथाशक्ती, यथामती योगदान दिवपाक जाय.
प्रा. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
