भांगरभूंय | प्रतिनिधी
मडगांव : दमन राय वाठारांत २०२० वर्सा वांगडी एडिसन सोरंग (२१) हांचेर खोर्यान हल्लो करून खून करपी आरोपी प्रदीप डुंगडुंग आनी आनंद साशा (दोगूय मूळ रा. झारखंड) हांकां दक्षीण गोंय अतिरिक्त सत्र न्यायालयान जन्मठेपेची ख्यास्त दिल्या.
न्या. सुधीर शिरगांवकार हांणी हो निकाल दिलो. प्रदीप डुंगडुंग (२६) आनी आनंद साशा (२३) हांणी वांगडी एडिसन सोरंग ह्या तरणाट्याचो खून केल्लो.
पुलिसांनी दिल्ले म्हायती प्रमाण, ही घडणूक ३० ऑगस्ट २०२० क रातच्या साडे धा वरांचेर घडिल्ली. मरण आयिल्लो एडिसन आनी दोनूय आरोपी मानाय म्हणून काम करताले आनी एकेच कुडींत रावताले. घडणुकेच्या रातच्या वेळार एडिसनाचे इश्टीणीच्या फोन नंबरवेल्यान आरोपी आनंद साशा हांणी एडिसनाचीं फकांडां करपाक सुरवात केली. हाका लागून तांचे मदीं वाद जालो. ह्या वादाचें रुपांतर मारपेटींत जालें. तेन्ना स्वताक वाटावपा खातीर मरण आयिल्लो एडिसनान आरोपी प्रदीपाचे छातयेर आनी हाताच्या आंगठ्याक घांस मारलो. उपरांत तिडकीन आनंद साशा हांणें एडिसनाचे तकलेर खोर्यान वार केलो. हातूंत एडिसनाचे तकलेक गंभीर दुखापत जावन तो रगतान माखलो. ताका पयलीं मडगांवां दक्षीण गोंय जिल्लो हॉस्पिटलांत आनी उपरांत बांबोळे जीएमसींत व्हेलो. उपचार सुरू आसतना ३१ ऑगस्ट २०२० दिसा ताका मरण आयलें.
हे सुनावणे वेळार वट्ट २३ साक्षीदार तपासले. हातूंत फॉरेन्सीक तज्ज्ञ, दोतोर आनी घडणुके सुवातेवेल्यान जप्त केल्ले रक्तांत माखिल्ले कपडे आनी खुना खातीर वापरिल्लें खोरें अशे म्हत्वाचे पुरावे सादर केले. आरोपींनी कसलेच तरेचो घटमूट पुरावो सादर करूंक नाशिल्ल्यान न्यायालयान परिस्थिती वळखून पुराव्यांच्या आदारार दोगांकूय जल्मठेपेची ख्यास्त दिली.
प्रदीप डुंगडुंग हो ३१ ऑगस्ट २०२० सावन बंदखणींत आशिल्ल्यान ताका ५ वर्सां, १० म्हयने आनी ८ दिसांचो काळ, जाल्यार आनंद साशा हो १ सप्टेंबर २०२० सावन बंदखणींत आशिल्ल्यान ताचो ५ वर्सां, १० म्हयने आनी ७ दिसांचो बंदखणींतलो आतां मेरेनचो काळ तांचे निमाणे ख्यास्तीच्या काळांतल्यान वजा करतले. गुन्यांवा कडेन संबंदीत जप्त केल्लो मुद्देमाल नेमां प्रमाण न्यायालयाच्या ताब्यांत दवरपाचे आदेश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
