भांगरभूंय | प्रतिनिधी
पुलीस, कुटूंब घेतात तिचो सोद
म्हापशें: बोरली रायगड हांगाची कुटूंब आनी सोयऱ्यां सयत गोंयांत पर्यटना खातीर आयिल्ली स्नेहा राज कांबळे (27) ही लग्न जाल्ली बायल कळंगूट दर्यादेगे वेल्यान बेपत्ता जाली. कळंगूट पुलीस तशेंच कुटूंब तिचो सोद घेतात.
ही घडणूक फाटल्या शेनवारा 18 वेर दनपारां बेपत्ता स्नेहा, तिचो घरकार, कुटुंबांतले हेर वांगडी वेंगुर्ल्यां आपल्या सोयऱ्यां कडेन आयिल्ले. थंय तांच्या सोयऱ्यांनी गोंयांत कळंगूटे वचपाचो आग्रो धरलो तेन्ना वट्ट 13 जाण कळंगूट दर्यादेगेर आयिल्ले. हो गट सांजवेळा परतुपाचो आशिल्लो.
दर्यादेगेर आयले उपरांत सगले दर्यांत न्हान घेताले. ह्या वेळार स्नेहा शौचालया खातीर वता म्हणून सांगून दर्यादेगेरूच आशिल्ल्या पे टॉयलेटी कडेन गेली. पूण बरोच वेळ ती परतून आयली ना. घरकार राज आनी तांचे बरोबर आयिल्ल्या सोयऱ्यांनी सगली कडेन तिचो सोद घेतलो. पूण ती सांपडूंक शकली ना.
उपरांत तांणी कळंगूट पुलिशेंत कागाळ दिली. पुलिसांनी दर्यादेगे वेल्या आस्थापनांतल्यो सीसीटीव्ही फुटेजी तपासल्यो. हातूंत ती दर्यादेगे वेल्यान मुखेल रस्त्याचे वटेन वचत आशिल्ल्याची दिसून आयली. पूण ती उपरांत खंय गेली हें समजूंक शकलें ना.
पुलिसांनी राज कांबळे हांचे कागाळी वेल्यान स्नेहा कांबळी ही बेपत्ता जाल्ल्याचें प्रकरण नोंद केलें.
मजगतीं, स्नेहा आनी राज हांचे तीन वर्सां पयलीं लग्न जाल्लें. पुलिसांनी स्नेहाचे कॉल डिटेल्स मागयल्यात आनी फुडलो तपास पुलीस निरिक्षक दितेंद्र नायक हांच्या मार्गदर्शना खाला हवालदार विशाल गांवस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
