भांगरभूंय | प्रतिनिधी
कोलंबो, खबरां संस्था: श्रीलंकेंत बेगीनूच रामायण स्थळांची उदरगत जातली. श्री रामजल्मभूमी तीर्थ क्षेत्र ट्रस्टाचे भांडारी स्वामी गोविंददेव गिरी महाराज आनी ट्रस्टाच्या वरिश्ठ अधिकार्यांनी श्रीलंकेंत रामायण ट्रेल प्रकल्पाचें उक्तावण केलें. ह्या वेळार तांचे वांगडा लंकेचे सभापती महिंदा यापा अबेवर्धने, क्रिकेट खेळगडो सनथ जयसूर्या, श्रीलंकेतले भारतीय उच्चायुक्त संतोष झा आनी जायते खासदार आनी वरिश्ठ अधिकारी आशिल्ले. उदरगत करपाच्या सुवातीं मदीं मुखेल म्हळ्यार रामान पांय दवरपाची सुवात, जंय सीता बंदखणींत आशिल्ली, तशेंच हनुमान आनी कुंभकर्ण गुहा आनी रावणाचे तपश्चर्येचे सुवातेची उदरगत जातली. दुसरे वटेन संतोष झा हांणी भारतीय दूतावासांत स्वामी गोविंददेव गिरी महाराज आनी ट्रस्टाच्या वरिश्ठ अधिकार्यांक येवकार दिलो. मजगतीं, रामायण ट्रेलाची उदरगत, लोकां मदीं संपर्क आनी श्रीलंकेंत अर्थीक उदरगत घडोवन हाडपाचे मार्ग हांचेर चर्चा जाली. श्रीलंकेंतल्या सद्याच्या रामायण ट्रेलाच्यो वट्ट ५२ सुवातो श्रीलंका सरकाराच्या सहकार्यान उदरगत करतले.
रामबोध हनुमान देवळांत पुजा
स्वामी गोविंददेव गिरी हांणी हनुमान जल्मोत्सवा निमतान श्रीलंकेंतल्या कँडी लागसारा डोंगरी भागांत आशिल्ल्या रामबोध हनुमान मंदिरांत विशेश पुजा केली. ह्या देवळांत १८ फूट उंचायेची हनुमानाची मूर्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
