भांगरभूंय | प्रतिनिधी
जोयडा : जोयडा- कारवाराक जोडपी म्हत्वाच्या रामनगर- सदाशिवगड राजमार्गा वयल्या देवळी क्रॉस वाठारांतलो रस्तो परतून खचिल्ल्यान येरादारी मुखार व्हड संकट उबें रावलां. कांय म्हयन्यां पयलींच बांदकाम कोट्यांनी रुपया खर्च करून राखणे वणत उबारून रस्तो घटमूट करपाचें काम सुरू केल्लें. मात तेच सुवातेर रस्तो सुमार एक फूट खचिल्ल्यान विभागाच्या कामाचे गुणवत्तेचेर प्रस्न निर्माण जाला. तशेंच जिल्लो केंद्रा कडेन संपर्क तुटपाची शक्यताय आसा.
विशेश म्हळ्यार, राजमार्गार हे सुवातेर दर वर्सा पावसांत रस्तो खचपाच्यो घडणुको घडटात. ही समस्या कायमची सोडोवपाक फाटलीं पांच-स वर्सां वट्ट तीन फावटीं कोट्यांनी रुपया खर्चून राखणे वण्टी उबारल्यो. मात त्यो कोसळ्ळ्यो. पोरणो डांबरी रस्तो आनी माती काडून रस्त्याची पातळी सकयल देंवयली आनी वट्ट दोन म्हयन्यां आदीं नव्यान डांबरीकरण केलें. मात पयल्याच पावसांत ते सुवातेर रस्तो परत खचिल्ल्यान नागरिकां मदीं भंयाचें वातावरण निर्माण जालां. तशेंच बांदकाम खात्याच्या कामाच्या दर्जाचेर प्रस्न निर्माण जाला.
नुज्जी ते अणशी रस्त्याची वायट अवस्था
मजगतीं, नुज्जी ते अणशी ह्या पुराय मार्गावेलें डांबरीकरण खुबश्या सुवातांचेर आडकून गेलां. अणशी घाटांत आनी रामनगर पसून कद्रा मेरेन जड वाहनां वरवीं सुरू आशिल्ल्या खडी येरादारीक लागून खुबश्या सुवातांवेलो रस्तो पोंदाक गेला. खुबशे कडेन व्हड फोंडकुलां पडल्यांत. सेगीत पडपी पावसाक लागून पालसणां कोसळपाचो खोको वाडला. इबाडिल्ल्या रस्त्याक लागून प्रवाशांचे सुरक्षिततायेचो प्रस्नूय मुखार आयला.
ह्या मार्गावेल्यान कैगा प्रकल्पा खातीर जड वाहनांतल्यान व्हडा प्रमाणांत खडी येरादारी चालू आसता. तशेंच कारवार -बेळगांव, कोल्हापूर, पुणे, पिंपरी, दांडेली, जोयडा आनी रामनगरकडेन धांवपी एसटी आनी खासगी वाहनां ह्याच मार्गाचो वापर करतात. अणशी, कुंभारवाडो आनी ह्या वाठारांतले शेकड्यांनी विद्यार्थी, नोकरदार आनी नागरीक सदांच ह्या रस्त्यावेल्यान प्रवास करतात. दक्षीण- पश्चीम भागांतल्या म्हळ्यार कुंभारवाडो, अणशी, उळवी भागांतल्या गांवांक तालुको केंद्रा कडेन संपर्क करपा खातीर ह्या रस्त्याचो वापर करचो पडटा. हाका लागून रस्तो खचिल्ल्यान खंयच्याय खिणाक गंभीर अपघात जावपाची शक्यताय उक्तायतात.
जिल्लो केंद्रा कडेन संपर्क तुटपाची शक्यताय
रामनगर- सदाशिवगड राज्य मार्ग हो जोयडा, दांडेली आनी हल्याळ म्हालाक कारवार जिल्लो मुख्यालया कडेन जोडपी मुखेल मार्ग. पावसाचो नेट वाडल्यार रस्तो आनीक खचपाची वा येरादारी पुरायेन बंद जावपाची शक्यताय निर्माण जाल्या. अशें जाल्यार जोयडा सयत ह्या दोनूय म्हालांचो जिल्लो केंद्रा कडेन संपर्क तुटपाचो धोको निर्माण जाला. हाका लागून प्रशासनान बेगोबेग लक्ष घालून मार्गाची सुरक्षितताय सुनिश्चीत करची, अशी नेटान मागणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
