रानांतलो उजो अधिवेशनांत पेट्टलो

भांगरभूंय | प्रतिनिधी

म्हादय, पर्यटक हल्लो, वाडटे अपघात थारतले मुखेल मुद्दे

पणजी : रानांतलो उजो आतां पालविल्लो आसलो तरी ह्या मुद्याचेर अधिवेशन पेट्टलें अशीं चिन्नां आसात. अर्थसंंकल्पी अधिवेशन 27 मार्च सावन सुरू जाता. वाडटे अपघात, म्हादयचो प्रस्न तशेंच पर्यटकांंचेर जावपी हल्ल्याच्या मुद्याचेर विरोधक सरकाराक धारेर धरपाचे आसात. अधिवेशनाची कार्यावळ निश्चीत करपा खातीर कामकाज सल्लागार समितीची आयज (सोमारा) सकाळीं बसका जातली.

विधानसभेचें अर्थसंंकल्पी ​अधिवेशन 27 मार्च ते 31 मार्च मेरेन जातलें. एक दीस रामनमीची सुटी आशिल्ल्यान अधिवेशन चार दिसांंचें आसतलें. 27 वा 28 मार्चाक मुख्यमंंत्री डॉ. प्रमोद सावंंत हे 2023 – 2024 वर्साचो अर्थंसंंकल्प सादर करपाचे आसात. आयज कामकाज सल्लागार समितीचे बसकेंत अधिवेशनाची कार्यावळ थारतली. अर्थंसंंकल्पाची तारीख लेगीत आयज निश्चीत जातली.

अधिवेशनाचो कालावधी सामको ल्हान आसा. चार दिसांंत राज्याचे प्रस्न मांंडप अशक्य आसा, अशें आमदारांंनी सांंगलें. रानां वाठारांत लागिल्लो उजो, पर्यटकांचेर जावपी हल्ले, वाडटे अपघात हे म्हहत्वाचे मुद्दे आसतले अशें आमदार विजय सरदेसाय हांंणी सांंगलें. काँग्रेस, गोवा फॉरवर्ड, आप आनी आरजी मेळून सरकाराक धारेर धरतले अशेंय तांंणी सांंगलें.

रान वाठारांत लागिल्ल्या उज्यान पर्यावरणाचें लुकसाण जालांं. रानवटी जनवारांंनी स्थलांंतरण केल्ल्याच्यो खबरो आयल्यात. लुकसाण तशेंच फुडाराक रानां वाठाराचें संंरक्षण कशें करतले? हाची जाप सरकाराक विचारतले. कळसा – भांंडुरा प्रकल्पाचो आराखडो अजून रद्द जावंंक ना. हाका लागून म्हादयचो प्रस्न अजून सुटावो जावंंक ना. म्हादय हो लेगीत म्हत्वाचो विशय आसतलो.

अतारांंकीत प्रस्न 15 वेल्यान 25 करपाची गरज

अधिवेशनांत अतारांंकीत प्रस्नाचेर सरकार लेखी जापो दिता. सध्या दिसाक 15 अतारांंकीत प्रस्नांच्यो जापो मेळटात. हो आंकडो 15 वेल्यान 25 करपाची मागणी आमदार विजय सरदेसाय हांंची आसा. एका प्रस्नाचेर 5 उपप्रस्न विचारपाक मेळटात. एका प्रस्नाक 8 उपप्रस्न विचारपाची संंद मेळपाक जाय.

विजेचेर चलपी वाहनां, बेरोजगारीचें प्रमाण, मुख्यमंंत्री देवदर्शन यात्रा हांंचेर अधिवेशनांत चर्चा जातली.

अपघातांंचें प्रमाण दिसान दीस वाडत आसा. येरादारी खातें तशेंच पुलीस ज्यो उपाय येवजण्यो करतात तांंकां येस मेळना. तशेंच आतां पर्यटकांचेर हल्ले जावपाक लागल्यात. पर्यटकांंचेर जावपी हल्ले हो हुस्क्याचो विशय आसा. अधिवेशनांत हाचेर चर्चा जावपाक जाय अशें सरदेसाय हांणी सांगलें.

अधिवेशनांत प्रस्न चर्चेक येवचे एक दीस पयलीं जाप मेळपाक जाय. जाप बेगीन मेळ्ळी जाल्यार अभ्यास करप तशेंच प्रस्न विचारप शक्य जाता अशें विजय सरदेसाय हांंणी सांंगलें.

अधिवेशनाची रणनिती थारावपा खातीर विरोधी आमदारांंची एकठांय बसका जावपाची आसा. गोवा फॉरवर्ड, आम आदमी पक्ष, आरजी आनी काँग्रेस हे सध्या विरोधी पक्ष आसात.