रानवटी जनावरांची शिकार करपी त्या शिकार्यांक धरले
भांगरभूंय | प्रतिनिधी
सावंतवाडी, खबरांसंस्था: रानवटी जनावरांची शिकार केल्ले खातीर आंबोलीच्या रानांत बंदूक, सुरो आनी टॉर्च घेवन भोंवपी 6 तरणाट्यांक रान विभाग आनी सावंतवाडी पुलिसांनी जोड कारवाय करून अटक केली. हांतले कांय जाण सावंतवाडी आनी कांय जाण बांदेचे जावन आसात. ही कारवाय आयज फांतोडेर सुमार सवाय चारांक हिरण्यकेशी रान वाठारांत केली.
हे सुवातेर आंदोलन करपी ग्रामस्थांना बंदुकेचो आवाज आयलो. तेन्ना हांगा ड्युटी करपी पुलिसांक ग्रामस्थांनी हे विशीं म्हायती दिली. सोद घेतल्या उपरांत हे स जाण सांपडले. तांकां ताब्यांत घेतल्यात. फुडली कारवाय सुरू आसा, अशें आंबोली रान क्षेत्रपाल विद्या घोडके हांणी सांगलें.
हे विशी चड म्हायती प्रमाण, आंबोले जमनीच्या प्रस्ना वयल्यान थळाव्यांनी मजत आंदोलन सुरू केलां. हें आंदोलन सुरू आसतना रातच्या साडेतीन वरांचेर ग्रामस्थांक बंदुकेचो आवाज आयकूंक आयलो. उपरांत तांणी पुलीस कर्मचार्यांक हे विशीं म्हायती दिली. उपरांत रानां कर्मचार्यांक आंदोलकांनी म्हायती दिली. ते प्रमाण सोद घेतलो तेन्ना स जाण सांपडले. तांची चवकशी केली तेन्ना तांचे कडल्यान बंदूक, सुरो, बॅटर्यो अशें जायतें सामान मेळ्ळें. तशेंच तांच्या सुर्याक रगत लागिल्लें. ताका लागून तांणी रानांतल्या जनावरांची शिकार केल्ल्याचोे दुबाव आसा.
शिकारे खातीर आयिल्ल्या मदीं फरान समीर राजगुरू (26), नेल्सन इज्माईल फर्नांडीस (42) (दोगूय रा. सालयवाडो- सावंतवाडी), बाबुराव बाळकृष्ण तेली (42, रा. सावंतवाडी, न्यु खासकीलवाडो), सर्फराज बाबर खान (34), रजा गुलजार खान (23)(दोगूय बांदा गडगेवाडी), अरबाज नजीर मकानदार (26, रा. माठेवाडो) हांचो आसपाव आसा.
तशेंच रानांतल्या जनावरांची शिकार केल्ल्या प्रकरणांत ताब्यांत घेतिल्ले गाडयेंत जनावरांचे केंस मेळ्ळ्यात. ताका लागून दुबावितांनी साळीची शिकार केल्ल्याचो दुबाव रान अधिकार्यांनी उक्तायला.
मजगतीं, आंबोलीच्या रानांत रानवटी जनावरांची शिकार करपाक जायते शिकारी येतात अशे फाटले कांय दिसां सावन कळून आयलां. थंय घाल्ले कॅमेरे कोणी तरी चोरिल्ले ते ह्याच शिकार्यांनी चोरिल्ल्याचो आरोप आशिल्लो. ते नेमके शिकारी कोण? तांचो सोद घेवपाची मागणी फाटल्या कितल्याशाच दिसां सावन लोक करताले. हे फाटभूंयेर आतां थळावे तरणाटे हांगा मेळून आयिल्ल्यान सगळे अजाप उक्तायतात. हे विशीं गुन्यांव दाखल करपाचें काम सुरू आशिल्ल्यान बेगीनूच फुडली म्हायती दितले, अशें घोडगे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
