भांगरभूंय | प्रतिनिधी
चोरयांचें प्रमाण वाडिल्ल्यान फोंडें पुलिसांची कारवाय
फोंडें: फोंडें वाठारांत रातच्या वेळार दुबावीत रितीन भोंवप्यां आड फोंडें पुलिसांनी कारवाय करपाची मोहीम सुरू केल्या. रातच्या वेळार दुबावीत रितीन भोंवप्यां मदीं वट्ट 11 गोंया भायल्या तरणाट्यांक अटक करून तांची जामिनार सुटका केली. फोंडें वाठारांत चोरयांचें प्रमाण वाडत आशिल्ल्यान हाचे मुखार लेगीत मोहीम सुरू दवरपाचो निर्णय पुलिसांनी घेतला.
फोंडें पुलीस शिमेंत फाटल्या कांय म्हयन्यां सावन चोरयांचें प्रमाण वाडलां. ताका लागून मध्यान रातीं दुबावीत रितीन भोंवप्यां आड कारवाय करपाची मोहीम फोंडें पुलिसांनी सुरू केल्या.
निरिक्षक विजयनाथ कवळेंकार हांच्या मार्गदर्शना खाला पुलीस कर्मचार्यांनी मध्यान रातीं भोंवपी 11 दुबावीत तरणाट्यांक ताब्यांत घेवन अटक केली. अटक केल्ल्या तरणाट्यांची दुसर्या दिसा जामिनार सुटका केली.
मध्यान रातीं शारांत तशेंच गांवगिर्या वाठारांत सद्या गस्त घालपाक सुरवात केल्या. एखादो दुबावीत मनीस दिसून आयल्यार ताचेर कारवाय करतले. तशेंच रस्त्याचे कुशीक आनी रानांनी रातच्या वेळार सोरो पियेवप्यां आड लेगीत कारवाय करपाक फोंडें पुलिसांनी सुरवात केल्या.
रातच्या वेळा वेली पुलिसांनी गस्त वाडयिल्ल्यान रातीं उसरां मेरेन सुरू आशिल्ल्या फास्ट फूड दुकान धनयां आड लेगीत कारवाय करतले. ताका लागून फास्ट फूड दुकान धनयांनी मध्यान रातीं मेरेन दुकानां उक्तीं दवरचीं न्हय अशें आवाहन फोंडें पुलिसांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
