भांगरभूंय | प्रतिनिधी
राज्यपालाचे सचिव एम आर राव हांची म्हायती
पणजीः राज भवनात आशिल्ल्या 100 वर्सा पोरण्यां झाडांची दुयेसां खातीर तपासणी करून तांचेर उपचार करपाक वृक्ष आयुर्वेद चिकित्सा हो उपक्रम मंगळारा हातांत घेतले. गोंयांत झाडाची कुयदाद घेवपाची ही पद्दत पयलेच फावट राज भवनात चालीक लागता, अशी म्हायती राज्यपालांचे सचिव एम आर राव हांणी दिली.
राज भवनाच्या दरबार हॉलात जाल्ले पत्रकार परिशदेत एम आर राव उलयताले. राज्यपाल पी एस श्रीधरन पिल्लय हांचे फुडारपणा खाला रान आनी पर्यावरण राखपा खातीर खास करून वखदी झाडांची जतनाय घेवपां खातीर उपक्रम हातांत घेतल्यात. वखदी वाटीका, चंदन आनी पणसाच्या झाडांचे जार्दिन, वामन वृक्ष उद्यान राज भवनांत सुरू करून पौराणिक भारताचे म्हालगडे चरक आयुर्वेदाचे संस्थापक आनी सुश्रुत सर्जरीचे संस्थापक हांचे पुतळे उबारपाचो निर्णय घेतला. आॅक्टोबरांत ताचें उक्तावण करतले, अशे राव हांणी सांगले.
राज भवनांतल्या 100 वर्सा पोरण्यां 7 झाडांक नवे जीवीत दिवपाची मोख 17 सप्टेंबराक प्रधानमंत्री नरेंद्र मोदी हांच्या वाडदिसा निमतान दवरल्या. हे खातीर राज भवनांन वृक्ष आयुर्वेद चिकीत्सा वा पोशण योग हे उपक्रम हातांत घेतले. वृक्ष आयुर्वेद हे झाडांचो दुर्मिळ विज्ञानाच्या तत्त्वाचेर ही प्रक्रिया चालीक लागतली, अशी म्हायती राव हांणी दिली.
मुख्यमंत्री डॉ प्रमोद सावंत हांच्या यजमानपणा खाला ही कार्यावळ चालीक लागतली. ही उपचार पद्दती करपां खातीर केरळच्यान आयुर्वेदीक संवर्धनवादी दोतोर आफयल्यात. ह्या उपक्रमांक लागून गोंयकारांक खास करून तरणाट्यांक सैमीक दायज आनी परंपरा तिगोवन दवरपांक उर्बा मेळटली, अशी आस्त राव हांणी उक्तायला.
मजगतीं, देश हो 2047 मेरेन विकसित भारत जावचो म्हूण प्रधानमंत्री नरेंद्र मोदी हांणी एक ध्येय दवरलां. तें साद्य जावचें म्हूण तांकां दीर्घायुश्य मेळचें म्हूण राज भवनान वेगवेगळे उपक्रम हातांत घेतल्यात. पयली राज भवन कपॅलात प्रार्थना जातली उपरांत गणेश मंदीर आनी श्वेत कपिला गोशाळेत पुजा जातली, अशे राव हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
