भांगरभूंय | प्रतिनिधी
फकत २० टक्के काजू उत्पादकांक आधारभूत मोलाचो लाव
मडगांव, प्रतिनिधी : राज्यांतल्या फकत २० टक्के काजू उत्पादकांक आधारभूत मोलाचो लाव मेळटा. तातूंत वाड करुन ‘ट्रेस नेट सायटी’ वयले म्हायती प्रमाण फाटल्या वर्सा सावन उत्पादकांक लाव दिवचो. सेंद्रीय काजूं खातीर १५ हजार आनी हेर काजूं खातीर १० हजार हॅक्टर जमीन दिवपाची येवजण आखची. अंदूं उण्या उत्पादनाक लागून राज्यांत ‘काजू दुकळ’ जाहीर करून शेतकारांक अर्थीक मजत करची आनी राज्या भायले काजू विक्रेचेर बंदी घालची, अश्यो मागण्यो आदर्श कृषी संस्थेचे अध्यक्ष प्रकाश वेळीप हांणी पत्रकार परिशदेंत केल्यो.
प्रकाश वेळीप हांणी काजू उत्पादक शेतकर्यांच्यो समस्या मांडल्यो. राज्यांत सध्या काजवाक ११३ रुपया दर आसा. राज्यांत ८ हजार हॅक्टर जाग्यार १६ हजार शेतकार काजू उत्पादन घेतात, जाल्यार ३५४६ शेतकार सेंद्रीय काजवांची लागवड करतात. सरकारा कडल्यान १५० रुपया आदारभूत मोल मेळटा. तें १७५ रुपया मेळचें अशी मागणी केल्ली. उण्यात उणे १६० रुपया तरी दिवचे. फकत २ हजार काजू उत्पादकां कडेन कृशी कार्ड आसा. आधारभूत मोला प्रमाण ३७ रुपयांचो लाव राज्यांतले २० टक्के शेतकारांक मेळटा. कृशी कार्ड सगळ्यां कडेन नासप, कृशी कार्डाचेर काजू लागवडीची जमीन नमूद आसप अश्यो जायत्यो आडखळी आशिल्ल्यान आधारभूत मोलाचो लाव मेळना. टेसनेट तशेंच काजू उत्पादक ज्या संस्थांक काजू विकतात, तांचें बिल गृहीत धरून शेतकारांक लाव दिवचो, अशें वेळीप हांणी म्हणलें.
फाटल्या वर्सा १९२० टन सेंद्रीय काजूंची लागवड जाल्ली, जाल्यार अंदूं ९०९ टन जाल्या. म्हळ्यार अंदूं फाटल्या वर्साचे तुळेंत ५० टक्के लेगीत उत्पादन जावंक ना. राज्य सरकारान राज्यांत काजू दुकळ जाहीर करचो आनी शेतकारांक अर्थीक मजत करची.
बाळ्ळे २६ एप्रिलाक शेतकरी मेळावो
आदर्श कृषी सहकारी खरेदी विक्री प्रक्रिया संस्था मर्यादितां वतीन २६ एप्रिलाक सकाळीं १० वरांचेर बाळ्ळीच्या आदर्श कम्युनिटी हॉलांत काजू शेतकरी मेळाव्याचें आयोजन केलां. हातूंत काजू शेतकारां कडेन येवपी आडखळींचेर चर्चा करतले. हाका लागून कृशी संचालक तशेंच मुख्यमंत्र्यांनी ह्या मेळाव्याक हाजीर रावचे असो उलो वेळीप हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
