भांगरभूंय | प्रतिनिधी
पणजी, बातमीदार ः राज्यांत 25 ते 31 मे ह्या काळांत मध्यम पावस पडपाची शक्यताय हवामान खात्यान उक्तायला. पूण ह्या काळांत खात्यान कसलोच अलर्ट जारी करूंक ना. 25 ते 28 मे ह्या काळांत वाऱ्याचो वेग वराक 35 ते 55 किमी पावपाची शक्यताय आशिल्ल्यान नुस्तेमारांनी दर्यांत वच्चें न्हय असो उलो खात्यान मारला. तशेंच लायफगार्ड एजन्सी दृष्टी मरीन कंपनीन पर्यटकांक गोंयांतल्या दर्यावेळांक भेट दितना फावो ती जतनाय घेवपाचो सल्लो दिलो.
शेनवारा पणजे चडांत चड तापमान 1 अंश देंवून 32.6 अंश सेल्सियस नोंद जालें. जाल्यार मुरगांवांत चडांत चड तापमान 0.3 अंश वाडून 33.6 अंश सेल्सियस नोंद जालें. फुडले सात दीस चडांत चड तापमान 33 ते 35 अंश सेल्सियस मदीं उरपाची शक्यताय आसा. 1 मार्च ते 25 मे ह्या काळांत राज्यभर सरासरी 118.8 मिमी पावसाची नोंद जाल्या.
चक्रीवादळाची शक्यताय
बंगालच्या उपसागरांत तयार जाल्ल्या उण्या दाबाच्या पट्ट्याची तीव्रता वाडपाची शक्यताय आसा. 25 मे सांजवेळा मेरेन तें चड खर जावन चक्रीवादळ जावपाची शक्यताय आसा. 26 मे दिसा बांगलादेश आनी अस्तंत बंगालांत हें चक्रीवादळ येवपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
