भांगरभूंय | प्रतिनिधी
भांगरभूंय I प्रतिनिधी
पणजी : तापमान वाडी सयत कांय कारणांक लागून राज्यांतल्या विवीध वाठारांनी उजो लागपाच्याे घडणुको घडल्यो. शुक्रार आनी शेनवारच्या 24 वरांत उजो लागपाच्यो 79 घडणुको घडल्यो. उजो पालोवपी दळाच्या जवानांनी 79 फोनांक प्रतिसाद दिवन घडणूक सुवातेर धांव घेवन उज्याचेर नियंत्रण मेळयले. हातूंत उजो लागपाच्यो 70 जाल्यार हेर अपघातांचे 9 फोन आयिल्ले. तातूंतल्या दोगांक वाचोवपाक दळाच्या जवानांक येस आयलां.
24 वरांत सगल्यांत चड उजो लागपाच्यो घडणुको मडगांव, फोंडें, म्हापशें, दिवचल, पेडणें ह्या वाठारांत घडल्यो. काजू बागायतींक उजो लागप, सुक्या तणांक उजो लागप, दुचाकी, घरांक उजो लागप अशो विवीध घडणुको घडल्यो. 79 फोनांक उजो पालोवपी दळाच्या जवानांनी प्रतिसाद दिलो. तशेंच दोगांक उज्यांतल्यान वाचयल्यात, अशी म्हायती उजो पालोवपी दळाचे संचालक नितीन रायकार हांणी दिली.
उजो लागपाच्यो घडणुको दिसान दीस वाडत आसात. फाटल्या वर्साचे तुळेंत अंदूं अशो घडणुको वाडल्यात, अशेंय रायकार हांणी सांगलें.
वाडटें तापमान, कोयर लासपाक लायिल्लो उजो, जळटी सिगारेट तणांत उलोवप, झाडांचे घर्शण तशेंच रेल्वे रुळांचेर जावपी घर्शण ह्या सारक्या कारणांक लागून थंयच्या सुक्या तणाक तशेंच बागायतींक उजो लागपाचे प्रकार वाडत आसात. अशा वेळार नागरिकांनी सादूर रावन अश्यो घडणुको टाळच्यो, अशें रायकार हांणी सांगलें.
कोलव्यां घर लासून गोबर, 20 लाखांचें लुकसाण
मडगांव : कोलव्यां फर्स्टवार्ड हांगा शुक्रारा रातीं कडेन घराक उजो लागून पुराय घर लासून गोबर जालें. उजो कसो लागलो हाचें कारण मात समजूंक ना. उज्यांत सुमार 20 लाखांचें लुकसाण जालें, असो अदमास आसा.
हे घर दुमींग फर्नांडीस हांच्या मालकीचें आसा. तो आपल्या हेर भावां सयत ह्या घरांत रावतालो. थळाव्यांनी दिल्ले म्हायती प्रमाण सुरवातीक आंगणांत दवरिल्ले दुचाकीक उजो लागलो. उपरांत घराक उजो लागलो. उज्यांत घरांतले फ्रीज, सोफा, फर्नीचर लासून गोबर जाले.
मडगांव उजो पालोवपी दळाच्या जवानांनी घडणूक थळाचेर वचून उज्याचेर नियंत्रण मेळयलें. हे खातीर उदकाचे बंब वापरले, अशी म्हायती उजो पालोवपी दळाचे विभागीय अधिकारी गील सौझा हांणी दिली.
हो उजो रातीं कडेन घरांतलीं सगलीं मनशा न्हिंदले उपरांत लागलो. कोणे तरी मुद्दम हो उजो लावपाक जाय, असो घरच्यांक दुबाव आसा. उज्यांत भांगरा वस्तीय लासून गोबर जाले, जाल्यार घरांतली एक चली धावेंत जाल्यार चलो णववेंत शिकता. तांची बुकां तशेंच शाळेंत घालपाचो गणभेस लेगीत लासलो.
मजगतीं, एकाच दिसा इतल्यो घडणुको घडिल्ल्यान उजो पालोवपी दळाच्या जवानांचेर ताण वाडलो. पूण तांणी जायत्या घडणूक सुवातांनी पावून उज्याचेर नियंत्रण मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
