भांगरभूंय | प्रतिनिधी
पणजीः तमिळनाडू आनी कर्नाटक हांचे मदीं तयार जाल्ल्या टर्फाक लागून आनी हेर हवामानांतल्या बदलांक लागून राज्यांत २४ ते २६ एप्रील मेरेन पावसाचो येलो अलर्ट जारी केला.
ह्या तीन दिसां खातीर उश्णताये खातीरय येलो अलर्ट जारी केला. शुक्रारा राज्यांत चडांत चड आनी उण्यांत उणें तापमान वाडिल्ल्यान उश्णताय कायम आशिल्ली. फुडले स दीस राज्यांत चडांत चड तापमान ३४ ते ३६ अंश सेल्सियस मदीं उरपाची शक्यताय आसा.
फाटल्या २४ वरांत पणजे चडांत चड ३५.३ अंश आनी उण्यांत उणें २६.६ अंश सेल्सियस नोंद जाला. मुरगांवां चडांत चड ३५ अंश आनी उण्यांत उणें २६.४ अंश सेल्सियस आशिल्ल्याचें नोंद जालां.
फुडले स दीस राज्यांतलें उण्यांत उणें तापमान २४ ते २६ अंश सेल्सियस मदीं उरपाची शक्यताय आसा अशें हवामान खात्यान सांगलां. २७ ते ३० एप्रील ह्या काळांत राज्यांतलें हवामान सुकें उरपाची शक्यताय आसा.
राज्यांत १ मार्च ते २४ एप्रील मजगतीं सरासरी २.४ मिमी पावसाची नोंद जाल्या. वाडपी उश्णतायेचे फाटभुंयेर भलायकी खात्यान नागरिकांक काळजी घेवची असो उलो मारला.
उश्णतायेचे त्रास टाळचे खातीर कॉटन कपडे घालप, सुर्याच्या किरणां पसून स्वताक राखप, घराचीं दारां, जनेलां उक्तीं दवरून हवा भितर सरतली हाची काळजी घेवची, सेगीत उदक पियेत रावचें अश्यो सुचवण्यो खात्यान केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
