राज्यांत बेगीनूच इ- रिक्षा आनी पायलटां खातीर इ- मोटरसायकलः मुख्यमंत्री

भांगरभूंय | प्रतिनिधी

स्मार्ट सिटीच्या स इ- बसींक मुख्यमंत्र्यान दाखयलो पाचवो बावटो

पणजी, प्रतिनिधी ः गोंयकारांक बरी येरादारी सेवा दिवपा खातीर लायटीचेर चलपी रिक्षा आनी पायलटां खातीर मोटरसायकली हाडपाचें आमी चिंतलां. प्रदुशण उणें जावचें हे खातीर आमचे यत्न चालूच आसतले. इव्ही बशी सुरु करुन आमी पारंपरीक खाजगी बस धनयांचेर कसलोच अन्याय जावचो ना हाची जतनाय घेतल्या, अशें मुख्यमंत्री डाॅ. प्रमोद सावंत हांणी सांगलें.
स्मार्ट सिटी येवजणे खाला पणजे शारांतले येरादारी खातीर स इव्ही बशींक मुख्यमंत्री सावंत हांणी पाचवो बावटो दाखयलो. हे वेळार येरादारी मंत्री मावीन गुदिन्हो, कदंब महामंडळाचे अध्यक्ष उल्हास तुयेंकार, सांताक्रुझचे आमदार रुडोल्फ फर्नांडीस, पणजेचे महापौर रोहित मोन्सेरात आनी हेर मानेस्त हाजीर आशिल्ले.

उक्तावणा वेळार उलयतना मुख्यमंत्र्यान सांगलें की जे थळावे खाजगी बस धनी वर्सान वर्स हांगा वेवसाय करतात तांची कदंब महामंडळाचे संचालकान बसका घेतल्या. तांकां फायदो जावचो म्हूण तांकां पर्यायी रुट दिल्यात. जर तांकां कितें समस्या आसात जाल्यार त्यो सरकारा फुडें मांडपाक जाता. फुडारांक लेगीत आमी तांकां तेंको दितले. तांचे वेवसाय खंयचेच परिस्थितींत बंद जावचे नात, अशें उतर मुख्यमंत्र्यान दिले.
उद्देग क्षेत्रा बरोबर मंत्री मावीन गुदिन्हो येरादारी मळांतूय बदल हाडपाक सोदतां. तांतूत इ- रिक्षा आनी मोटरसायकल पायलट हांचो आस्पाव करपाचो विचार आसा. कदंब महामंडळ लुकसाणांत आसून लेगीत आमी लोकांक बऱ्यो सुविधा दिवपाचे यत्न करतात. गांवगिऱ्या वाठारांनी येरादारी सोंपी करपा खातीर आमी ‘म्हजी बस’ येवजणेंक बळकटी दिवपाक सोदतात. खाजगी बस धनयांनी हे खातीर तयारी दाखयल्या. 56 बसी आमी हे येवजणे खाला घेतल्यात.

इव्ही बशी केन्ना सुरू जातल्यो म्हूण लोक उमळशीकेन वाट पळयताले. पूण बरें करूंक गेल्यार ताका विरोध जाता. पूण उच्च न्यायालयान स्पष्ट निर्देश दिल्ल्या कारणान आमी स बशी सुरू करपाक पावले. सध्याच्यो खाजगी बसी आसात तांकां दुसऱ्या रुटार घालतले, अशें गुदिन्हो हांणी सांगलें.
खंयचे बशींत बसप हें लोकांचेर निंबून आसा आनी लोक बरीच सेवा घेतले. गोंयकारांक बरी सुविधा मेळची हे खातीर मुख्यमंत्री आनीक इलेक्ट्रीक बशी हाडपाचो यत्न करता, पूण कदंब महामंडळाक लोकां कडल्यान सहकार्य जाय. जेन्ना आमी कठोर निर्णय घेतात तेन्ना तांकां विरोध जाता. पूण कोर्टान आमका मेकळीक दिली, अशें गुदिन्होन सांगलें.
सध्या फकत स बशी चलतल्यो. फुडारांक 48 बशींचो आस्पाव शारांतले येरादारी खातीर जातलो. ‘पीएमआय’ ही बस तयार करता आनी ह्यो बसी चलोवपाचे कंत्राट तांकांच दिला. फुल चार्ज केल्यार ही बस 180 किलोमिटर धांवता. हांतूत ऑनलायन सीसीटीव्ही कॅमेरा, एसओएस बटन, दिव्यांगा खातीर रॅप्म सुविधा हेर साबार गजाली आसात.