भांगरभूंय | प्रतिनिधी
दिवचले: राज्यांत अध्यात्मीक पर्यटन चालीक लागपा खातीर सरकार विशेश लक्ष दिता. जायतीं पुरातन धर्मीक स्थळां सुदारल्यांत. राज्यांतल्यो पवित्र सुवातो जपतना दक्षीण काशी म्हणून वळखपी गोंयांत हिंदू परंपरे प्रमाण ह्या वाठारांत लोकांनी गंगा आरती करपाकूय पंचगंगेच्या सुवातेचेर सुरवात करची. हे सुवातेर आधुनीक साहित्य दिवपा खातीर सरकार सगळे तरेचें सहकार्य करतलें, असो उलो मुख्यमंत्री डॉ. प्रमोद सावंत हांणी मारलो.
गोकुळाष्टमी उत्सवा निमतान नार्वेंच्या पंचगंगेचे देगेर मुख्यमंत्री डॉ. सावंत हांणी पुजा, अभिशेक केलो. गोकुळाष्टमीच्यो परबीं भेटयतना राज्याक उदरगतीचे दिकेन व्हरपा खातीर तांणी प्रार्थना केली.
हांगा जो घाट आनी न्हंयेची तड आसा त्या वाठाराचें एक कोटी रुपया खर्चून सोबितीकरण करतले. ह्या कामाचें उक्तावण मुख्यमंत्री डॉक्टर प्रमोद सावंत हांचे हस्तुकीं जालें. ह्या वेळार केंद्रीय मंत्री श्रीपाद नायक, राज्यसभा खासदार सदानंद तानावडे, आमदार प्रेमेंद्र शेट, महिला अध्यक्ष आरती बांदोडकार, प्रेमानंद म्हांबरे, दयानंद कार्बोटकार, जिल्लो पंचायत वांगडी शंकर चोडणकार, सरपंच संदेश पार्सेकार, देवळाचे पदाधिकारी तशेंच पंचायत वांगडी आनी हेर मानेस्त हजर आशिल्ले.
नार्वेंच्या तिर्थाचो इतिहास सामको प्राचीन आशिल्ल्यान पुर्तुगेज काळा आदींच्यान हांगा अष्टमीचो उत्सव मनयतात. गोंयचें पुराय सांस्कृतीक आनी आध्यात्मीक दायज राखपा खातीर सरकारान जायते कडेन आदल्या देवळांचें तशेंच आदल्या क्षेत्रांचें सोबितीकरण करपाचें काम हातांत घेतलां. तशेंच नार्व्यां अशे तरेचो साज दितना देशांतल्या हेर वाठारां प्रमाणूच हेय पंचगंगेचे तडीर गंगा आरती जावच्यो अशे तरेची सुविधा उपलब्ध करून त्यो सुरू करपाचोय उलो मुख्यमंत्र्यांनी ह्या वेळार मारलो.
ह्या वाठाराचें सोबितीकरण जाले उपरांत हांगा भाविकांचो आंकडोय वाडटलो. हांगा देवांच्यो बारा पालख्यो दर्शना खातीर येतात. हो आगळो वेगळो सुवाळो आशिल्ल्याचें मुख्यमंत्र्यान सांगलें. केंद्रीय राज्यमंत्री श्रीपाद नायक हांणी गोकुळाष्टमीचो सण हो मंगल्याचा उत्सव. हे पवित्र सुवातेर खुबशी सुदारणा जातली. ताका लागून खासदार निधींतल्यानूय गरजेची मजत दितले. तशेंच ह्या वाठारांत मसंडभूंये खातीरूय अर्थीक मजत दितले अशें तांणी स्पश्ट केलें.
राज्यसभा खासदार सदानंद तानवडे हांणी खासदार निधींतल्यान हांगा सुमार दोन कोटी रुपया खर्चून विवीध उदरगत येवजण्यो, सोबितीकरण येवजण्यो राबयतले अशें तांणी सांगलें. आमदार प्रेमेंद्र शेट हांणी राज्य सरकाराचे मजतीक मतदारसंघाची उदरगत जाता. हांगच्या पवित्र सुवातांची उदरगत वर्सा भितर जातली अशी हमी तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
