भांगरभूंय | प्रतिनिधी
ग्रंथालयांचो दर्जो वाडोवपा खातीर राज्य ग्रंथालय धोरणाक मान्यताय
भांगरभूंय । प्रतिनिधी
पणजी : राज्यांत वाचन संस्कृती निर्माण करून ती वाडोवपाच्या हेतान सरकारान गोंय राज्य ग्रंथालय धोरण 2034क मान्यताय दिल्या. राज्यांतल्या सगळ्या ग्रंथालयांचो दर्जो वाडोवपा सयत 90 ग्रंथालयांचें ई- ग्रंथालयांत रूपांतरण करपाची तजवीज धोरणांत आसा. मुख्यमंत्री डॉ. प्रमोद सावंत हांणी मंत्रीमंडळ बसके उपरांत पत्रकार परिशदेंत ही म्हायती दिली. मुख्यमंत्री डॉ. सावंत हांचे फुडारपणा खाला बुधवारा मंत्रालयांत मंत्रिमंडळाची बसका जाली. बिरेस्तारा 23 एप्रिलाक संवसारीक पुस्तक दीस मनयतात. दिसांन दिस वाचनाची सवय उणीं जायत आसा. वाचन संस्कृती वाडोवपाच्या हेतान सरकारान गोंय राज्य ग्रंथालय धोरण 2034 तयार केलां. ह्या धोरणाक मंत्रिमंडळान मान्यताय दिल्या. खासा कार्यावळींत ह्या धोरणाचे अनावरण जातलें. राज्यांत पंचायत, म्हाल पावंड्याचेर ग्रंथालयां आसात. पंचायत, म्हाल पावंड्या सयत विद्यालयां, म्हाविद्यालयांतल्या ग्रंथालयांचो दर्जो वाडयतलें. संगणाका सयत हेर सुविधा उपलब्ध जातल्यो. अभ्यासा सयत स्पर्धात्मक परीक्षेच्या तयारे खातीरची पुस्तकां उपलब्ध जातली. 90 ग्रंथालयांचें ई- ग्रंथालयांत रूपांतरण जातलें. सध्या 10 ग्रंथालयांचें ई- ग्रंथालयांत रूपांतरण जालां, अशें मुख्यमंत्र्यांन सांगलें.
बांदकाम संबंदी वाहनांक आतां नोंदणी वेळार शुल्क
बांदकाम वेवसायाकडेन संबंदीत आशिल्ल्या वाहनांक आता नोंदणी वेळारूच एक रकमी शुल्क लागू जातलें. तांका नूतनीकरणाचे शुल्क भरचे पडचे ना. हे खातीर मंत्रिमंडळान गोंय मोटर वाहन शुल्क दुरूस्ती अध्यादेश 2026क मान्यताय दिल्या. बांदकाम संबंदीत वाहनां खातीर सध्याच्या शुल्काची पद्धत बंद जातली.
खण पीडीतां खातीरच्या रिण फारीक करपी येवजणेक मुजतवाड
खण वेवसायाचे ट्रक तशेंच मशीनरी धारकांक रिण फारीक करपा खातीर खासा येवजण सरकारान सुरू केल्ली. हे येवजणेक 2027 मेरेन मुजतवाड दिल्या.
हे भायर मंत्रिमंडळान नवीकरण आनी अक्षय ऊर्जा खात्यांत 6 पदांच्या निर्मितीक मान्यताय दिल्या. तशेंच रवींद्र भवन काणकोण संस्थेक सोसायटी स्थापन करपाकूय मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
