भांगरभूंय | प्रतिनिधी
भांगरभूंय । प्रतिनिधी
पणजीः राज्यांतल्या वट्ट 25 अधिसुचीत पाणथळ आनी तांचे बफर झोनांचे डिजिटल प्रमाणीकरण आनी प्रत्यक्ष भौतीक सीमांकन करपाचे थारयलां. सर्वोच्च न्यायालयान दिल्ल्या आदेशाक पाळो दित गोंय राज्य पाणथळ प्राधिकरण ही प्रक्रीया पुराय करतले. हे प्रक्रियेक लागून पाणथळ सुवाते भितर आयिल्ली बेकायदो बांदकामां आनी अतिक्रमणाचेर चाप बसतली. हे विशींचो अहवाल सर्वोच्च न्यायालयांत सादर करचो पडटलो.
पर्यावरणाचो ह्रास थांबोवपा खातीर एक व्हड न्यायालयीन हस्तक्षेप करतना, भारताच्या सर्वोच्च न्यायालयान सगळ्या राज्यांक आनी केंद्रशासित प्रदेशांक देशांतल्या 2.3 लाखां परस चड पाणथळ सुवातींचे डिजीटल प्रमाणीकरण आनी भौतीक सीमांकन बेगीन पुराय करपाचो आदेश दिला.
न्यायालयान अधिकाऱ्यांक स्पेस ॲप्लिकेशन सेंटर (एसएसी-इस्रो) ॲटलासांतल्या सॅटेलायट डेटाचो वापर करून, पाणथळ सुवातींची मुळावी पळोवणी आनी चड काळा सावन रेंगाळिल्ली प्रक्रिया रोकडीच पूराय करपाक सांगलां.
ह्या आदेशाक अनुसरून पाणथळ प्राधिकरणांक प्रगत ड्रोन सर्वे आनी जिओग्राफिक इन्फॉर्मेशन सिस्टीम (जीआयस) मॅपिंग वापरप करप सक्तीचें आसा. ह्या तंत्रगीन्यानाचो वापर करून एक जाहीर, संवादात्मक डिजीटल मॅपिंग प्लॅटफॉर्म तयार जातलो. एकदां हो डिजीटल रेकॉर्ड तयार जालो, की पाणथळ सुवातींच्या शिमो निर्धारीत जावन निर्बंध लागतले. हाका लागून रिअल इस्टेट डेव्हलपर्स वा थळाव्या संस्थांक जमिनीच्या वापरांत कसलोच बदल करप वा बेकायदेशीर वेपारी कब्जा करप शक्य जावचें ना.
ह्या प्रक्रियेत फोंडें म्हालांतले पंचमी तळें, तळावली तळें, कोनशें तळें, तरवळें तळें, आर्ला केरी तळें आनी बेताळ तळें, साश्ट म्हालांतले माकाझन तळें, सार्झोरा तळें, पाली तळें, सापू तळें आनी दुर्गा तळें, केपें म्हालांतले नंदा तळें, शेल्डें तळें आनी कोठंबी तळें, दिवचल म्हालांतले कोदाळ तळें आनी कोळमवाडो तळें, मुरगांव म्हालांतले भांडोळें तळें, तिसवाडी म्हालांतले भाटी तळें, सुलाभाट तळें, बोंडव्हाळ तळें, करमळी तळें आनी तोयार तळें, बार्देस म्हालांतले पर्रा तळें, दाशी तळें आनी पिळर्ण तळें हे पाणथळ तशेंच तांचे बफर झोनाचे डिजिटल प्रमाणीकरण आनी सिमांकन जातलें.
सगल्या संबंदीत भागधारकांनी आनी व्यक्तींनी वयल्या गजालींची योग्य नोंद घेवची आनी जमनीची पडताळणी करपी अधिकाऱ्यांक पुराय सहकार्य करचें, अशें आवाहन प्राधिकरणान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
