राज्यांतल्या दर्यादेगांचेर रस्ताद सुण्यांनी चाबपाच्या घडणुकींनी वाड

भांगरभूंय | प्रतिनिधी

लायफगार्डां सयत नागरिकांचो आस्पाव

पणजी, बातमीदार ः राज्यांतल्या दर्यादेगांचेर रस्ताद सुणे भोंवतना दिसतात. देखून सुण्यांनी चाबपाच्या घडणुकींनी बरीच वाड जायत आसा. दर्यादेगेर तैनात आशिल्ल्या तीन लायफगार्डांक रस्ताद सुण्यांनी चाबले. ह्यो घडणुको फाटल्या दोन सप्तकाच्यो आसात आनी तांकां गरजेचे वैजकी उपचार दिल्यात.
लायफगार्ड रोशन पाटील हाका बुधवारा 22 मे दिसा बेताळ भाटी दर्यादेगेर गस्त घालतना रस्ताद सुण्यान चाबलो. जाल्यार लायफगार्ड सर्वेश तांडेल हाका मंगळारा 21 मे दिसा कळंगूट दर्यादेगेर गस्त घालतना दर्यादेगेवेल्या रस्ताद सुण्यान चाबलो. फाटल्या सप्तकाच्या शेवटाक उत्तर आनी दक्षीण गोंय सेक्टराचे ऑपरेशन्स मॅनेजर दृष्टी मॅरीन लायफसेव्हर शशिकांत जाधव हांकां ई-सायकलांतल्यान मांद्र्यां दर्यादेगेर गस्त घालतना रस्ताद सुण्यान तीन फावटीं चाबले. तांचेर फावो ते वैजकी उपचार करुन तांका लस दिली.
एप्रील म्हयन्यांत बाणावलें वेगवेगळ्या घडणुकांनी रस्ताद सुण्यांच्या चाबण्याच्यो दोन घडणुकी घडिल्ल्यो. रशियेंतल्या 35 वर्सां पिरायेच्या बायलेक पांच सुण्यांनी चाबले. दृष्टी लायफगार्डांनी बायलेक वाटायले आनी उपचारा खातीर लागसारच्या हॉस्पिटलांत व्हेली.
तशेंच कॅनडांतल्या एका बायलेचो चार सुण्यांनी फाटलाव करून तिच्या उजव्या पांयाक चाबले. उपरांत लायफगार्ड क्लेटन वाझ हाणें तिका मजत करुन वैजकी उपचारा खातीर लागसारच्या हॉस्पिटलांत धाडली.
बॉलिवूड अभिनेती रय्या लबीब सुटये खातीर गोंयांत आयली तेन्ना तिचोय रस्ताद सुण्यांनी चाबो घेतलो. हें घडणुकेंत रय्या जखमी जाली.
फाटल्या सप्तकांत बाणावली दर्यादेगेर ई-सायकल चलयतना रस्ताद सुण्यांनी 24 वर्सां पिरायेच्या रशियन बायलेक चाबले. मे म्हयन्याच्या मदीं लोटलेंच्या 24 वर्सां पिरायेच्या बायलेक बाणावली दर्यादेगेर रस्ताद सुण्यांनी स ते सात फावटीं चाबले. उपरांत तिका लोटलेंच्या प्राथमीक भलायकी केंद्रांत उपचारा खातीर व्हेली. जाल्यार कोलवा हांगा सकाळीं मॉर्निंग वॉक करपाक गेल्ल्या एका जाण्ट्या मनशाचेर रस्ताद सुण्यांनी हल्लो केलो.