भांगरभूंय | प्रतिनिधी
पणजी ः राज्यांतल्या 41 ते 59 वर्सां पिरायेच्या कलाकारांक ह्या वर्सा सावन कला वृद्धी पुरस्कार दितले. दर वर्सा धा कलाकारांक दरेकीं 25 हजार रुपया दिवन भोवमान करतले अशें कला आनी संस्कृती मंत्री गोविंद गावडे हांणी सांगलें. बिरेस्तारा पणजेत जाल्ल्या पत्रकार परिशदेंत ते उलयताले. ह्या वेळार खात्याचे संचालक सगुण वेळीप हजर आशिल्लें.
राज्य सांस्कृतीक पुरस्कार, कला गौरव, युवा सृजन अशे वेगवेगळे पुरस्कार राज्याच्या कलाकारांचो भोवमान करपा खातीर खात्या कडल्यान दितात अशें मंत्री गावडे हांणी सांगलें. युवा सृजन पुरस्काराची पिराय मर्यादा 25 ते 40 वर्सां आसा. जाल्यार कला गौरव पुरस्कार 60 वर्सां वयर पिरायेच्या कलाकारांक दितात. पूण 41 ते 59 वर्सां पिरायेच्या कलाकारांक कसलोच पुरस्कार दिना हें आमच्या लक्षांत आयलें. देखूनच कला वृद्धी पुरस्कार सुरू करतात.
अंदूंचे कला वृद्धी पुरस्कार हेर पुरस्कारा वांगडा दितले. कला वृद्धी पुरस्कारा खातीर अर्ज करपाची निमाणी तारीख आयच्यान एक म्हयनो आसतली. हाचे खातीर अर्ज कला आनी संस्कृती खात्याचे संचालनालय, सगळे रवींद्र भवन आनी राजीव गांधी कला मंदिर हांगा मेळटले. वेगवेगळ्या मळां वयले कलाकार अर्ज करपाक पात्र आसात. अर्ज करपी कलाकार मूळ गोंयचो आसप गरजेचें.
पयलीं युवा सृजन पुरस्कार मेळिल्ल्या कलाकारांक कला वृद्धी पुरस्कारा खातीर अर्ज करपाक मेळचो ना. मेळिल्ल्या अर्जांची समिती वरवीं चवकशी जातली आनी पुरस्कारा खातीर वट्ट 10 जाणांची निवड जातली. निवड समितीक जाय जाल्यार सुमोटो पद्दतीनय ह्या पुरस्कारा खातीर कलाकारांची निवड जातली.
लिटल स्टार सर्तीचें आयोजन
राज्यांतल्या ल्हान भुरग्या मदलीं कला सोदपा खातीर खाशेली सर्त आयोजीत करतले अशें मंत्री गावडे हांणी सांगलें. ही सर्त यत्ता सातवी ते धावे मेरेनच्या विद्यार्थ्यां खातीर आसतली. सर्तीचें वेळापत्रक बेगीनूच जाहीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
