भांगरभूंय | प्रतिनिधी
पणजी : भलायकी खात्यान केल्ली जागृताय मोहीम, स्वयंसेवी आनी हेर संस्थांनी आयोजीत केल्लीं रगतदान शिबिरां आनी बर्या दर्जाची भलायकी सेवा उपलब्ध आशिल्ल्यान राज्यांतल्या इत्सूक रगत दान करप्यांचो आंकडो २७ टक्क्यांनी वाडला अशी म्हायती खात्याचे सचीव यतींद्र मराळकार हांणी दिली. पर्वरे संवसारीक रक्तदाता दिसा (World Blood Donor Day) आयोजीत कार्यावळींत ते उलयताले. ह्या वेळार डॉ. जास्मिन पिंटो, डॉ. सुनीता आर्लेकार, डॉ. प्रियांका माशेलकार, गौरीश धोंड, विजय जगताप आनी हेर अधिकारी हाजीर आशिल्ले.
२००५ वर्सा राज्यांत एकठांय केल्ल्या वट्ट रगत युनिटांतले ५३ टक्के युनीट इत्सूक रगतदानांतल्यान आयिल्ल्याचें मराळकार हांणी सांगलें.
२०२५ वर्साच्या निमाणे मेरेन हो आंकडो ८० टक्क्यां मेरेन पावला. सेगीत जागृताय मोहीम, लोकां मेरेन पावपाचे वेगवेगळे यत्न, रगत घालपाची सेवा घटमूट करप, खात्याच्या कर्मचार्यांच्या घटमूट वचनबद्धतेक लागून हें शक्य जालां. योग्य कृती, भौशीक शिक्षण आनी नैतीक पद्दतीन खूब कितें साध्य करूं येता.
इत्सूक रगतदात्यांचो आंकडो जरी वाडला तरी सुरक्षीत रगत सगळ्यांक उपलब्ध करून दिवपाक कांय आव्हानां कायम आसात. रगत तपासणी आनी सांठोवपाचे उंचेले दर्जे सांबाळप, आनी रगतदात्यांक हे प्रक्रियेकडेन जोडून दवरप हीं मुखेल आव्हानां आसात. वांगडा रगतदाना विशीं लोकांच्या मनांतलो भंय पयस करप गरजेचें. मुळावी बांदावळ घटमूट करप, जागृताय निर्माण करप आनी तरणाट्यांक रगतदान प्रक्रियेंत वांटो घेवप हाचेर भर दिवपाक जाय, अशें तांणी मुखार सांगलें.
आमी आतांमेरेनचें मेळिल्लें येस तिगोवन, तातूंत आनीक उदरगत करपाचे यत्न करपाक जाय. अंदूंचे मोहिमेंत दरेका रक्तदानाच्या केंद्र सुवातेर ’मानवता’ हे भावनेक प्राधान्य दिलें. ही मोहीम आमकां उगडास करून दिता, रक्तदान ही फकत वैजकी प्रक्रिया न्हय. ती एकता, करुणा आनी समाजीक जापसालदारेचें एक घटमूट प्रतीक. वेळार रगत मेळप सामकें गरजेचें आसता. तुमी दिल्लें रगत तिगांचो जीव वाटोवपाक शकता, असो उलो मराळकार हांणी मारलो.
रक्तदान करप्यांक सरळ देवदर्शन
केपें सार्वजनीक गणेशोत्सव मंडळाचे इच्छित फळदेसाय हांणी, मंडळा वतीन २०२३ सावन एक उपक्रम सुरू केला. ते प्रमाण रक्तदान करपी मनशाक रांगेंत उबें करिनासतना सरळ देवदर्शन दिलें. फाटल्या वर्सा ४०० परस चड भक्तांनी रक्तदान करून देवदर्शन घेतलें. अंदूंय हो उपक्रम चालूच उरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
