राज्यपालान 144 कॅन्सर दुयेंतींक भेटयली अर्थीक मजत

भांगरभूंय | प्रतिनिधी

पणजी ः राजभवनांत आयज आयोजीत केल्ले कार्यावळींत राज्यपाल पी. एस. श्रीधरन पिल्लई हांणी राज्यपाल निधीतल्यान 144 कॅन्सर दुयेंतीक अर्थिक मजत भेटयली. राजभवनाच्या पोरण्यां दरबार सभाघरांत आयोजीत केल्ले हें कार्यावळींत राज्यपालांचे सचीव एम. आर. एम. राव आनी अतिरिक्त सचीव संजीव सी. गांवस देसाय हाजीर आशिल्ले.
राज्यपाल पिल्लई हांणी जाहीर केल्ले प्रमाण डायलीसीस, कॅन्सर आनी हेर दुयेंतींक अर्थीक मजत वाटपाचें काम चालू आसा. गोंयांत राजभवनान सुरू केल्लो अशा प्रकारचो उपक्रम हेर राज्यांनीय सुरू करून गरजू लोकांक अर्थीक मजत दितात. राजभवनाच्या ह्या उपक्रमाची हेर राज्यांनी तोखणाय केल्ली आसा, अशें राज्यपालान सांगलें.

कॅन्सर दुयेंसाचेर आता सगळीं कडेन उपचार उपलब्ध आसात आनी वेळार उपचार घेतल्यार 80 टक्के दुयेंती बेगीन बरे जातात. अशा दुयेंतींक मानसीक आदार दिवपा वांगडा वैजकी उपचारांचेर विस्वास आसपाक जाय. राज्यपालान कॅन्सर दुयेंतीं बेगीन बरे जावचें अशें देवालागीं मागलें.
राज्यपालान अर्थिक मजतीचे धनादेश संबंदीत अतिरिक्त जिल्हाधिकारी आनी मामलेदारां कडेन दिले.
सुरवेक राज्यपालांचे सचीव एम. आर. एम. राव हांणी सगळ्यांक येवकार दिलो. श्रेया गुरव हांणी उपकार मानले.