भांगरभूंय | प्रतिनिधी
पणजी, प्रतिनिधी : राज्यपाल पी. एस. श्रीधरन पिल्लई हांणी गोंयच्या लोकांक चवथीचीं परबीं भेटयल्यां. राज्यपाल आपल्या संदेशांत म्हणटात, चवथीच्या शुभ आनी उमेदीच्या प्रसंगार हांव गोंयच्या लोकांक म्हजी मना- काळजा सावन परबीं दितां.
चवथ हो एक चड म्हत्वाचो उत्सव आसून तो देशांत सगळे कडेन व्हडा दबाजान मनयतात. देव- देवतांच्या मंदिरांत श्रीगणेशाक खासा स्थान आसा. श्रीगणेश हे विघ्नहर्ता आनी मंगलमुर्ती म्हळ्यार सगळ्यो अडचणी पयस करून मंगलमय वातावरण निर्माण करपी दैवत आसा. कसल्याय शुभ कार्याची सुरवात करतना श्रीगणेशाची पयलीं पुजा करतात.
चवथ हो गोंयचो व्हड सण. ह्या उत्सवा निमतान कुटुंबांतले सगळे वांगडी एकठांय येतात. चवथीच्या सणाक विवीध तरेचे गोड जिन्नस तयार करतात. फळ-फळावळ आनी हेर रानांतल्या वनस्पतींची माटोळी हें चवथीचें खास आकर्शण आसता.
ह्या सुवाळ्याक भागीदार जावपाची प्रत्येकाक संद आसता. हो सुवाळो स्नेहभाव, समाजीक एकवट आनी परस्पर समजीकाय घटमूट करता. हो सण गोंयचो एकवट घटमूट करता. ह्या शुभ प्रसंगार गोंयच्या लोकांचेर श्रीगणेशाचो कृपा, आशिर्वाद आसूं आनी प्रत्येकाचे जिणेंत येस, खुशालकाय आनी भरभराट येवं, अशें राज्यपाल आपल्या संदेशांत म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
