भांगरभूंय | प्रतिनिधी
भांगरभूंय । प्रतिनिधी
सावड्डेंः सावड्डें- कुडचड्याच्या शणै गोंयबाब सेवा केंद्रान आयोजीत केल्ले सर्गेस्त राजेंद्र (राजू) चिमणू नायक यादस्तीक अखील गोंय पांवड्या वयले कोंकणी कविता सर्तीत अंबेश तलवडकर हांच्या “मनीस सामको बीझी जाला ” हे कवितेक (२ हजार ५०० रुपये) पयलें इनाम फावो जालें. कुडचड्यार आय.एन. सी. सभाघरांत ही सर्त उमेदीन जाली.
देविता खुळे हिका (२ हजार रुपये.) दुसरें इनाम आनी सागर वेळीप हाका (१ हजार 500 रुपया) तिसरें इनाम फावो जालें. साईशा शेट शिरोडकर, रिया कुडाळकर आनी साईशा सराफ हांकां उमेद वाडोवपी इनामां मेळ्ळीं. इनामां वांटप सुवाळ्यांत आदले कायदो आनी शिक्षण मंत्री ॲड. डॉमनीक फर्नांडीस मुखेल सोयरे, जाल्यार डॉ. सर्वानंद सावंत देसाय आनी प्रा. मनिषा उपाद्ये प्रभूदेसाय मानाच्यो सोयरे म्हूण हाजीर आशिल्ले.
राज भाशेचो प्रसार आनी उदरगती खातीर राज्य शासनान जाय तितली अर्थीक तजवीज करपाक जाय अशें डॉमनीक फर्नांडीसान हांणी ह्या वेळार सांगून तांणी शणै गोंयबाव सेवा केंद्राच्या वावराची तोखणाय केली. कार्यावळींत स.राजेंद्र नायक हांचे एकनिष्ठ कार्यशिलते विशीं मरणा उपरांत भोवमान श्रीमती रमिता नायक हिका भेटयतलो.
केंद्रा वतीन हालींच घेतिल्ले कथिका सर्तीच्या जैतिवंतांक इनामां भेटयलीं. हेर मानेस्तांची तशेच परिक्षकांच्या वतीन पराग सबनीस हांची मार्गदर्शनांचीं उलोवपां जालीं. सुरवेक केंद्राचे अध्यक्ष मनोहर नायक हाणे सगल्यांक येवकार दिलो. कार्यावळीचें सुत्रसंचालन. स्नेहल रामा नायक हिणें केलें आनी निमणें उपकार मानले. कार्यावळीक जेश्ट नागरीक लक्ष्मण भाऊ मडगांवकार, मोहनराव बोरकर, प्रदीप नायक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
