भांगरभूंय | प्रतिनिधी
राजस्थान रॉयल्सान दिल्ली कॅपिटल्साक हारोवन अंदूंचे इंडीयन प्रिमीयर लिगेच्या (आयपीएल) अंदूंच्या हंगामांतली परंपरा कायम दवरली. आयपीएलाच्या 17व्या हंगामांतले णववे मॅचींत लेगीत येजमान पंगडान आपलो शेक कायम दवरलो. तशेंच राजस्थान रॉयल्सान सेगीत दुसऱ्या जैताची नोंद केली. ऋषभ पंताच्या फुडारपणाखाला खेळपी दिल्ली कॅपिटल्साक 12 धांवड्यांनी हार घेवची पडली.
मॅच अखेरचे ओव्हरी मेरेन रंगली. आवेश खानान अखेरची ओव्हर उत्कृश्ट रितीन घालून राजस्थान रॉयल्साचें जैत निश्चीत केलें.
दिल्ली कॅपिटल्साक निमाण्या 12 बॉलांनी जैता खातीर 32 धांवड्यांची गरज आशिल्ली. 19वी ओव्हर संदीप शर्मान घाली. हे ओव्हरीच्या पयल्या बॉलाचेर स्टब्सान सको मारलो. ते उपरांत फुडल्या बॉलाचेर चवको मारलो. आतां 10 बॉलांनी 22 धांवड्यांची गरज आशिल्ली. फुडल्या बॉलाचेर एक धांवडी आयिल्ल्यान अक्षर पटेलाक बॅटिंगेची संद फावो जाली. 19वे ओव्हरीच्या चवथ्या बॉलाचेर लेगीत एक धांवडी आयली. 8 बॉलांनी 20 धांवड्यांची गरज आसतना एक धांवडी घेवन स्टब्सान परतून एकदा अक्षराक स्ट्रायक दिली. निमाण्या बॉलाचेर दोन धांवड्यो आयिल्ल्यान निमाणे ओव्हरींत जैता खातीर 17 धांवड्यांची गरज आशिल्ली.
आवेश खानान पयल्या बॉलाचेर फकत एक धांवडी दिली. आतां अक्षर पटेल स्ट्रायकाचेर आशिल्लो. दुसऱ्या बॉलाचेर एकूय धांवडी येवंक ना आनी दिल्लीची आस्त मात्शी उणावली. तिसऱ्या बॉलाचेर अक्षराक एक धांवडी घेवप शक्य जालें. तीन बॉलांनी 15 धांवड्यांची गरज आशिल्ली. पूण, आवेशान आनीक एक बरो बॉल घालून एक धांवडी दिली. आतां फकत औपचारीकताय बाकी आशिल्ली. कारण दिल्लीक दोन बॉलांनी 14 धांवड्यांची गरज आशिल्ली. पांचव्या बॉलाचेर एकूय धांवडी आयली ना. निमाण्या बॉलाचेर एक धांवडी आयली अशे तरेन दिल्लीक 12 धांवड्यांनी हार घेवची पडली.
ते आदीं टॉस हारल्या उपरांत पयलीं बॅटींग करतना राजस्थान रॉयल्सान सन्मानजनक धांवसंख्या उबारपाक येस मेळयलें. यशस्वी जयस्वाल आनी जोस बटलर हे सवात भितर तंबूंत परतून गेल्या उपरांत येजमान पंगडाचेर चेपण आयिल्लें. पूण, राजस्थान रॉयल्सान संथ गतीन धांवड्यो करीत पावर प्ले सोंपयलो. मुखेली संजू सॅमसनाक लेगीत खाशेलें प्रदर्शन करपाक जमूंक ना. पूण, मदले फळयेंत बॅटिंगेक आयिल्ल्या रियान परागान मैदान गाजयलें. ताणें अर्द शेंकड्याची खेळी करून घरच्या चाहत्यांक जागे केले. ताणें 45 बॉलांनी स सके आनी सात चवक्यांचे मजतीन नाबाद 84 धांवड्यो केल्यो. ताणें एन्रिक नॉर्तजेची बॉलींग फोडून काडली. दिल्ली वतीन निमाणी ओव्हर घालपाक आयिल्ल्या नॉर्तजे आड परागान 25 धांवड्यो केल्यो. ताणें तीन चवके आनी दोन सके मारले आनी निमाण्या बॉलाचेर एक धांवडी घेतली.
ताका आर आश्विन आनी ध्रुव जुरेल हांणी साथ दिवपाचो यत्न केलो. आश्विनान 19 बॉलांनी 29 धांवड्यो करतना तीन सके मारले. ध्रुव जुरेलान 12 बॉलांनी तीन चवक्यांचे मजतीन 20 धांवड्यो केल्यो. ह्या दोगां खेरीत शिमरोन हेटमायरान लेगीत निमाण्या ओव्हरींनी म्हत्वाच्यो धांवड्यो केल्यो. ताणें सात बॉलांनी नाबाद 14 धांवड्यो केल्यो. ताणें एक चवको आनी एक सको मारलो. हांकां लागून राजस्थान रॉयल्सान निर्धारीत 20 ओव्हरींनी 5 विकेटी वगडावन 185 धांवड्यो करप शक्य जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
