भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज राजस्थान रॉयल्सा आड खेळपाक रॉयल चॅलेंजर्स बंगळुरू मैदानांत देंवतलो, त्या वेळार ओपनर फाफा ड्युप्लेसिस आनी विराट कोहली हांचेर सगल्यांची नदर आसतली.
फाफ ड्युप्लेसिसाची बॅटींग अंदूंच्या हंगामांत पावर प्लेच्या मुखार वचपाक जमूंक ना. तशेंच कोहलीक जयपूरांत अजून मेरेन अर्द शेंकडो मारपाक जमूंक ना.
फाफ ड्युप्लेसिसान फाटल्या हंगामांतल्या पावरप्लेंत 168चे स्ट्रायक रेटीन धांवड्यो केल्ल्यो. त्या वेळार ताची सरासरी 119 इतकी आशिल्ली. अंदूंच्या हंगामांत मात फाफ ड्युप्लेसिस अजून मेरेन खेळिल्ल्या चारूय मॅचींनी पावरप्लेंत बाद जाला. अंदूंच्या हंगामांत फाटल्या हंगामांत पावरप्लेंत बाद जावपा परस चड आसा. आयचे मॅचींत लेगीत तो फॉर्मांत येवपा विशीं दुबाव आसा. हाचे फाटलें कारण म्हणल्यार राजस्थानान आतां मेरेन खेळिल्ल्या तीन मॅचींनी णव पावरप्ले विकेटी घेतल्यात. ट्रॅण्ट बोल्टा आड खेळटना फाफ ड्युप्लेसिस 15 टी-20 डावांनी तीन खेपे बाद जाला.
कोहली अजून मेरेन जयपूरांत आठ टी-20 मॅची खेळ्ळा. पूण, ताका अजून मेरेन अर्द शेंकडो मारपाक जमूंक ना. तशेंच ताची सरासरी लेगीत 21.28 इतकी आसा. अशी हेर खंयच्याच मैदानाचेर ताची सरासरी इतकी उणी ना. कोहलीक संदीप शर्माक तोंड दिवचें पडुये. आयपीएलांत संदीप शर्मान ताका सगल्यांत चड सात खेपे बाद केला.
बंगळुरू फाटल्या कांय मॅचीं सावन दिनेश कार्तिकाचो उपेग निमाण्या ओव्हरींनी करता. तो फास्ट बॉलरांक येसस्वी रितीन तोंड दिता. पूण, लेग स्पिनरां आड तो धडपडटा आनी राजस्थान पंगड युजवेंद्र चहलाचो उपेग स्लॉग ओव्हरींनी लेगीत करता. ताका लागन कार्तिक आड चहल अशी लडाय पळोवपाक मेळुये.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
