भांगरभूंय | प्रतिनिधी
खबरां संस्था
जयपूरः आयपीएलाच्या 17 व्या सिझनांतल्या सवाई मानसिंग स्टेडियमाचेर जाल्ले चवथे मॅचींत राजस्थान रॉयल्सान लखनौ सुपर जायंट्साक 20 धांवड्यांनी हारोवन आपल्या ह्या सिझनाची सुरवात जैतान केली. पयलीं बॅटींग करतना राजस्थान रॉयल्सान कॅप्टन संजू सॅमननाच्या वादळी अर्द शेंकड्याच्या खुस्तार 4 आवट193 धांवड्यो केल्ल्यो. ताका जाप दितना लखनौ सुपर जायंट्साक कॅप्टन केएल राहुल आनी निकोलस पुरणाच्या अर्ध शेंकड्याच्या नाड्यार फकत 6 आवट 176 धांवड्यो करपाक जमलें.
लखनौ वतीन डावाची सुरवात करपाक क्विन्ट डिकॉक (4) आनी कॅप्टन, विकेटकीपर केएल राहुल (58) आयिल्ले. डिकॉक रोखडोच आवट जालो जाल्यार देवदत्त पड्डिकल खातें उगडनास्तना पॅव्हेलियनांत परतलो. आयुष्य बडोनी लेगीत 1 धांवडी करून आवट जालो. दीपक हुडान 26 धांवड्यो केल्यो. त्या उपरांत आयिल्ल्या निकोलस पुरनान 41 बॉलांत 4 चौके आनी 4 सक्यांनी 64 धांवड्यांची शानदार खेळी केली. स्टॉयनीस 3 धांवड्याचेर सवाय भितर आवट जालो आनी केएल राहुल सोडल्यार बाकीचे बॅट्समन चड धांवड्यो करपाक शकले नात. लखनौचे बॅट्समन राजस्थानाच्या बॉलिंगे सामकार चड वेळ तिगपाक शकले नात. राजस्थाना वतीन ट्रेंट बोल्टान 35 धांवड्यो दिवंन 2 विकेटी घेतल्यो. बर्गर आनी आश्विनान दरेकी 1 विकेट घेतली. चहल आनी संदीप शर्माक 1-1 विकेट घेवपाक येश आयलें.
राजस्थान रॉयल्साचो कॅप्टन संजू सॅमसनाक टॉस जिखून पयलीं बॅटींग करपाचो निर्णय घेतलो. यशस्वी जयस्वाल आनी जॉस बटलरान डावाची सुरवात केली. मात बटलर 11 धांवड्यो करून आवट जालो. जयस्वालान 24 धांवड्यो केल्यो. आवट जावचे पयलीं ताणे आपल्या विस्फोटक शैलींत 1 सको आनी 3 चौके मारले. त्या उपरांत आयिल्ल्या संजू सॅमसनान (82), आनी रियान परागान (43) 100 परस चड धांवड्यांची भागिदारी केली. संजून 52 बॉलांत 3 चौके आनी 6 सक्याचे मजतीन वादळी 82 धांवड्याची खेळी केली. जाल्यार रियानान 29 बॉलांत 3 सके आनी एका चौक्यान 43 धांवड्यो केल्यो. हेटमायर 5 धांवड्याचेर आवट जालो. ध्रूव जुरेलान एक चौको आनी एका सक्यान नांबाद 20 धांवड्यो करून स्कोर 193चेर व्हेलो. लखनौ वतीन मोहसीन खानात 4 ओव्हरींत सगल्यांत चड 45 धांवड्यो दिवंन 1 विकेट घेतली. नवीन उल हकान 41 धांवड्यांत 2 आनी रवी बिश्णोयाक एक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
